Roldan: Pamilya o politika?

Monday, November 28, 2011

MEDYO layo pa ang piniliay apan ang mga Dabawenyo nagsige na'g istorya bahin niini. Ang mga langyaw nagtawag nga "best past time" nato ang eleksiyon. Mora kini'g pista o Pasko nga gipangandaman kaayo. Ang piniliay maoy panahon nga ang ordinaryong tawong lungsod mahimong ekspertong tigpaniid sa politika. Alang sa ubang tawo, panahon kini sa trabaho, pagpanginabuhi bisan kon tigpamilit lamang o tighatag og handbills sa mga kandidato taliwala sa naglagiting nga init sa adlaw.

Sa ubang kandidato, ang eleksiyon panahon sa kuwaresma. Panahon kini sa pag-antus, kamatayon ug pagkabanhaw. Panahon kini sa pagpasingot, pagngisi bisan kon nasuko, pagpanghadlok og bata, paglamano sa mga tawo ug pagbuhat sa butang nga imposibleng buhaton sa naandang panahon sud sa 45 hangtud sa 60 ka adlaw sa kampanya. Ang adlaw sa eleksiyon mao ang panahon sa pagpahipi og "bankrupt day" sa mga kandidato nga naparot.

Have something to report? Tell us in text, photos or videos.

Adlaw usab kini sa pagkabanhaw sa mga nakadaug sa eleksiyon bisan kon kini tungod sa "dagdag-bawas" o dula sa politika. Ang kadtong kanunay lang modagan ug maparot nagpadayon sa ilang panahon sa kasubo hangtud sa sunod nga adlaw sa piniliay.

Apan medyo nasayo ang paghisgot sa eleksiyon karon tungod kay nahilambigit kini kang Mayor Sara Duterte-Carpio. Iyang gianunsiyo nga di siya magpasubli sa pagka-Mayor sa sunod piniliay kay gusto niyang mabuntis ug magtukod og pamilya. Primero pa kini niyang termino isip Mayor ug dako ang iyang purohan nga modaug.

Kung mahinumdoman, nagdumiling modagan si Mayor Sara pagka- Bise Mayor niadtong 2002 apan napugos siya sa iyang amahan nga si Rody. Kahibalo si Rody ug ang iyang mga lideres sa politika sama nila ni Jun Evasco, Atty. Tonying Llamas, Engr. Jacinto ug uban pa nga usa ka Duterte lamang ang makapildi sa mga Nograles nga ilang hingpit nga kaatbang sa politika sa Davao.

Busa gilampaso ni Inday Sara si kanhi Speaker Prospero "Boy" Nograles sa eleksiyon niadtong 2010. Kabalak-an tuod ang mga Nograles tungod kay wa mosalir ang popularidad ug karisma sa bangiitang konsehal nga si Mabel Sunga-Acosta batok kang Carlo Nograles pagka-kongresista sa unang distrito.

Ang anunsiyo sa Mayor dili tungod kay di niya kaya ang trabaho kon dili tungod sa ilang tinguha sa iyang bana nga si Atty. Manases Carpio nga magkaanak.

Sa tinuod, may tigpaniid nga mas kuyaw pa modumala si Inday kaysa sa iyang amahan ug may kaugalingon siyang diskarte nga di magpadiktar sa unsa mang grupo.

Sa iyang paglingkod, wala niya dawata ang multi-million pesos nga intelligence funds gikan sa Malacañang. Niluwat usab siya sa katungdanan isip pangulo sa Regional Peace and Order Council nga tua na karon kang Davao del Norte Governor Rodolfo Del Rosario. Iya sab nga gipakubsan ang tabang sa kapulisan nga iyang giawhag nga magtarong gihapon sa ilang trabaho. Daghan siyang giusab sa dagan sa City Hall aron nga mas abtik kining motubag sa panginahanglan sa katawhan sa Davao nga walay pagpaburot gikan sa media.

Gidayeg ko si Mayor Sara sa iyang tinguha ug unta may mopuli kaniya nga angayan sa puwesto bisan kon wa kini suportahi sa iyang amahan o kaha gikan gihapon sa pamilyang Duterte.