Roldan: Children's Audit

Monday, December 5, 2011

MEDYO layo na ang nakab-ot sa Pilipinas sa hisgutanang pag-atiman sa mga kabataan. Human giratipikahan sa Senado sa Pilipinas ang United Nations Convention on the Rights of the Children (UNCRC) niadtong Hulyo 1990 nagpadayon na ang pagduso sa mga balaod ug programa alang sa mga bata.

Wala ko miingon nga way nahimo para sa bata ang rehimen ni kanhi Presidente Ferdinand Marcos tungod kay naghimo siya og Presidential Decree 603 nga nag-ila sa kaakuhan sa gobyerno sa pag-atiman sa pagprotekta sa mga batang Pinoy.

Have something to report? Tell us in text, photos or videos.

Apan daghan gihapon kanato ang nangutana kung sakto na ba ang pag-atiman sa estado sa katungod sa mga bata? Nakabati ba ang mga bata nga giatiman sila sa kagamhanan ug sa ilang mga tagsa-tagsa ka pamilya subay sa UNCRC?

Busa ang terre des homes (TDH) Germany, usa ka international NGO (INGO) ang nagpahigayon og Children's Audit sa upat ka siyudad diri sa Mindanao aron masuta kung maayo na ba ang ilang kahimtang ug maingon ba nato nga nadawat na nila ang katungod nga ilang madawat isip mga bata.

Lima ka grupo sa mga bata gikan sa Davao, General Santos, Zamboanga, ug Ozamiz ang naghimo og audit nga nahuman niadtong Oktubre.

Gitabangan ang mga bata sa mga NGOs nga partners sa TDH sa maong mga siyudad nga nagprepara kanila kung unsa ang UNCRC og katungod sa mga bata. Usa ang grupo sa KAKASAKABA o Katawhan Kontra Abuso sa Kababayen-an ug Kabataan Children's Group diha sa Barangay Mandug. Gipaluyohan kini sa Barangay Council pinaagi ni Kagawad Richard Jim Navales, Teresita Maranan sa Council of Women ug pipila pa ka lideres sa maong barangay.

Ang paagi sa ilang pagkuha sa datos sa mga bata mao ang surbey ug focus group discussions nga sila mismo ang nagpahigayon.

Sa tinuod, subo ang resulta nga ilang nakuha sa 172 ka mga bata nga niapil. Matud pa sa report nga kadaghanan kanila nakasinati og Pagbiaybiay (bullying) ug uban pang klase sa abuso sulod sa komunidad (24.4%).

Gisundan kini sa Pagpugos sa Pakig-away (19.2%), Pagpugos sa Pag-inom sa ilimnong makahubog (11.0%) ug Pagpanghuraw (7.6%). May abuso sab sulod sa eskuwelahan sama sa Pag-punish/Pagkasaba sa Teacher (20.9%), Pagpakaulaw (19.2%), ug Bullying (19.2%).

Hasta sab sa sulod sa balay diin may mga bata nga nakasinati og abuso sama sa Pagkasaba sa Ginikanan (36.0%), Pagbunal/Paghapak (19.2%), Pagpatrabaho og Bug-at (9.3%). Ingon pa nila nga wala silay namatikdan nga mga programa sa gobyerno para kanila busa nisugyot sila nga Dugang Programa ug Serbisyo (52.9%), More Police Visibility (17.6%), Pag-organisa sa mga bata ug pag-seminar sa mga bata (8.8% matag usa). Tungod kay diri sila sa Davao, nihatag usab sila'g opinion kabahin sa extra-judicial killings (EJK) sa mga bata.

Halos tanan kanila nisugyot nga unta Ihunong na ang pagpamatay kanila (85.1%) ug Hatagan og Hustisya ang biktima (4.3%). Kung atong lantawon, bisan diay sa kadaghan na sa balaod ug programa kuno alang sa mga kabataan, daghan gihapon kanila ang nabiktima sa kabangis ug kadaghanan natong mga hamtong mukhang guilty niini. Ginaingon nga ang kahimtang sa kabataan nato karon maoy hulagway sa katilingban sa umaabot.