Roldan: Katungod sa luwas sa polusyon

Monday, December 12, 2011

ANG Disyembre 10 maoy ika 63 nga anibersaryo sa Universal Declaration of Human Rights (UDHR). Human sa mapait nga kasinatian sa nilabay'ng duha ka giyerang mondial, nagkahiusa ang United Nations (UN) nga wa nay giyera ug ang katawhan sa kalibutan makatagamtam og kalingkawasan ug dignidad isip tawo. Gibutang nila sa papel ug pulong niadtong 1948 sa tanang sakop sa UN nga respetuhon, i-promotar ug protektahan ang katungod sa tawo ug sulbaron ang mga bangi tali sa mga nasud sa malinawon nga paagi. Ang UDHR maoy gibasihan sa halos tanang balaod karon kabahin sa tawhanong katungod. Giniyahan kini sa mga prinsipyo nga ang tawhanong katungod interrelated, indivisible and inalienable, universal and equal. May nahibal-an akong HR group nga naglista og 53 ka katungod sa tawo. Matud pa nila ang ang ika-53 nga katungod mao ang "walay bisan kinsa nga makakuha niining katungod sa imo." Karong bag-o, ilang gidugangan og ika-54: "katungod nga mogamit og internet."

Ang pagpuyo sa kinaiyahan nga walay polusyon usa ka katungod nga gilagda sa atong Konstitusyon. Sa paglingkod ni P-Noy sa puwesto iyang gideklara ang total logging ban. Daghan sab nga nahimong balaod ang Pilipinas sama sa clean air act, solid waste management ug sa climate change mitigation.

Have something to report? Tell us in text, photos or videos.

Ang nakaparat lang kay hinay pa sa umang ang implementasyon niining mga balaod.

Nalipay usab ang Davao sa pagpasar sa City Council sa anti-aerial spraying ordinance nga hangtud karon tua pa sa Korte Suprema kay giprotestahan sa mga negusiyante sa saging. Mora'g mga Salvador del Mundo ang mga konsehal nga nidapig niini.

Apan nibali ang huros sa hangin sa dihang ilang gi-aprubahan ang katukuran sa coal-fired plant sa Aboitiz didto sa Barangay Binugao. Ang bagitang Konsehal Leah Librado ra tawon nga misupak sa plano. Hastang lipaya sa mga pro coal plant kay masulbad na ang brown-outs sa Mindanao.

Karong bag-o, nagminghoy sila tungod kay gi-veto ni Mayor Inday Sara ang Ordinance No. 0200-11 nga nag-reclassify sa maong luna aron madayon na ang proyekto. Matud pa ni Inday Sara sa iyang sulat mensahe sa SP nga nituo siya nga adunay umaabot nga krisis sa enerhiya sa Mindanao apan "nabalaka ako sa dautang epekto sa proyekto ngadto sa panglawas og kinaiyahan." Nag-lecture si Mayor nga may tulubagon ang lokal nga kagamhanan sa pagprotekta sa panglawas ug kinaiyahan ug pagpakgang sa makaguba niini. Ingon pa niya "ang mga planta nga nagsunog og coal mobuga og pino kaayo nga mga kemikal ug minerals nga mosulod sa baga sa tawo."

Dugang niya nga ang January 2009 (US) Presidential Task Force nga namugna aron maglantaw sa energy direction sa Amerika "nagpabor sa pagwagtang sa coal-fired power plants." Ug kon ipadayon daw kini sa gobyernong lokal, daw niatras kini inay nga mopadugang sa progreso.

Maayong pagkagaray ni Mayor ug naka-LIKE ko sa iyang veto message.

Nalipay ang mga sakop sa anti-coal plant coalition nga maghimo og mobilisasyon sa SP sa ilang sesyon karong Martes aron hisgutan ang veto message sa Mayor. Kon giwagtang na sa US ug Europe ang ilang coal ug nuclear plants, nganong ibutang pa nato diri?