Roldan: Pahalipay sa kabataang lumad sa Pasko

Saturday, December 17, 2011

PAGHINATAGAY ang diwa sa Pasko. Gitudloan kita sa bata pa nga adlaw'ng natawhan ni Jesus ang Pasko. Gigasa sa Amahan ang Iyang bugtong anak aron maluwas ang Iyang linalang dinhi sa yuta. Tungod niana gidasig usab kita nga suklian nato ang iyang gasa sa paghatag og gasa ngadto sa uban. Apan sa pagdagko nato, medyo lahi na ang atong pagsabot sa Pasko apan ang diwa nagpabilin lang gihapon.

Ang Pasko ni Andres Bonifacio mao ang paghatag sa iyang kinabuhi sa iyang "Tinubuang Lupa" ug sa uban nga nisunod kaniya sa paggamit og armas ug pagsulat aron pildihon ang mga nagpakabus ni Juan de la Cruz.

Have something to report? Tell us in text, photos or videos.

Ang 9 ka milyon nga OFWs naghatag sa ilang kinabuhi bisan sa kainit sa disyerto o kabugnaw sa yelo aron lang makatabang sa ilang pamilyang nagkinahanglan. Bisan kung daghang OFWs nga anaa karon sa death row sa selda sa China ug Saudi Arabia samtang ang mga gi-rescue sa giyera sa Middle East nagpila na usab sa job fairs ug recruitment agencies aron mobalik didto. Apan kining tanan wala panumbalinga sa Worldwide Filipino Alliance (WFA), usa ka grupo sa mga Pilipino sa gawas ug sulod sa nasud nga mohatag og kalipay sa Pasko alang sa mga batang lumad didto sa Tibi-tibi Elementary School nga nahimutang sa bungtod sa Talaingod, Davao del Norte.

Niadtong Disyembre 14, ang mga WFA volunteers nga gipangulohan sa Executive Vice President Arman Muleem nga gikan pa sa Filipino kingdom of Jeddah nisaka didto ug nagdala og mga pagkaon, school supplies ug computer sets alang sa maong eskuwelahan. Ikaduha na kining gihimo sa WFA ug sa iyang local counterpart nga Pangdaigdigang Alyansa ng Pilipino, Inc. (PAPI) isip pagtabang sa pag-eskuwela sa mga batang lumad sama sa mga libro, bags ug school supplies.

Ang lig-ong haligi sa WFA sa Australia nga si Leo Ceniza nikuyog sa unang outreach program sa Hunyo 2011 ug nibalik siya aron pag-deliver sa mga PC computers ug laptop nga magamit sa mga magtutudlo ug mga kabataan.

Mainiton silang gidawat ni Ms. Reynaly G. Santos, principal, mga magtutudlo, mga PTA reps, ug siyempre ang sobra 400 ka mga estudyante.

Dunay gihimong hamubo apan mabulukon nga programa diin gi-turn-over ang mga gasa. Giubanan si Muleem ni Romy Lagahit, PAPI president sa paghatag sa ngalan sa mga donors sama nila ni Atty. Lolita Farmer, Leo Ceniza ug mga higala sa Australia, si Jeddah Knights ug mga kauban sa KSA, ang way pagkakapoy nga WFA primemover Prof. Cesar Torres ug mga higala sa US ug sa uban pang nagsuporta sa maong programa. Didto pod sa programa si DepEd District Supervisor Noli T. Felipe ug Municipal Administrator Sandro Tocmo nga nagbasa sa mensahe ni Mayor Basilio Libayao. Matud pa niya nga nalipay siya sa nakab-ot sa Tibi-tibi Elementary School kay daghang talentado ug bright nga mga bata gikan niini. Nakadaug sab ang ilang cultural group sa provincial competition bisan gamay ang ilang instrumento.

Tungod niini, nibalik sa entablado si Arman Muleem ug nagsulti nga mopalit ang WFA og duha ka agong alang kanila.