Tingog sa Lumad sa konseho

Saturday, January 14, 2012

DILI kasarangan ang niaging sesyon sa Sangguniang Panlungsod (SP) karong semanaha. Daghan ang nagpunsisok nga mga tawo nga naay pandong sa ulo ug nagsul-ob sa ilang kulturanhong sapot. Daw mora kini'g "occupy Almendras gym" sa mga Lumad sa panahon sa Pasko sa nanglabay'ng panahon. Apan makasaysayanon kini tungod kay gipahural ni Mayor Inday Sara Duterte si Datu Berino Libayao Mambo-o, 48 anyos, isip ika-27 nga konsehal sa dakbayan sa Davao nga nagprepresentar sa mga Lumad sa Davao. Una kini sa kasaysayan busa angayan lamang nga ato kining hinumduoan isip mga Dabawenyos.

Si Konsehal Mambo-o kay gikan sa tribong Ata-Manobo sa Barangay Mapula nga gilangkuban og 40,000 ka mga pamilya diha sa Paquibato District ug sa kasikbit nga Talaingod, Davao del Norte. Nagtrabaho siya sa Local Registrar's Office isip maoy tigpahigayon sa mga ceremonial weddings sa Lumad busa naila na siya sa tanang tribo diri sa atong siyudad. Gipili si Mambo-o gikan sa lima pa ka laing tribo subay sa Republic Act 7160 o ang Local Government Code of 1991 diin gimando ang pagbutang sa SP ug sektoral nga representante sa mga kabus o nadisbentaha nga grupo sa katilingban sama sa mga kabataan nga gi-representahan sa Sangguniang Kabataan ug ang mga punong barangay o Association of Barangay Captains. Molingkod isip konsehal si Mambo-o sa tulo ka tuig ug ilisdan sa sunod nga representante sa tribong Kagan, Klata o Dyangan, Matigsalug, Tagabawa ug Uyo Manobo.

Have something to report? Tell us in text, photos or videos.

Gipahalipayan ko ang atong lokal nga kagamhanan sa paghimo niining maong lakang ilabi na si Mayor Sara ug mga konsehal kay nahitabo na ang dugay nang gipaabot sa mga Lumad nga may tingog sila diha sa konseho. Niadtong 1997, ang mga grupo sa kababayen-an nagplano nga moduso sa pagbutang og representante sa mga kababayen-an diha sa SP dihang gipanday pa nila ang Women Development Code of Davao City. Apan ang sulti sa mga politiko ug Department of Interior and Local Government (DILG) nga di kini puwede tungod kay wala pa daw Implementing Rules and Regulations (IRR) ang maong probisyon sa Local Government Code. Anaa tingali kausaban sa nasyonal nganong nadayon gayud ang paglingkod ni Mambo-o sa konseho sa Davao. Nagpasalamat kita nga naa nay molantaw sa kaayohan sa mga Lumad ilabi na sa pagsulbad sa problema sa Christmas migration sa mga Lumad aron manaygon ug pagpalimos. Daghan sab kaayong buhatong balaudnon si Mambo-o ug team niya aron matubag sab ang problema sa mga "wandering Badjaos" diri sa siyudad. Matud pa ni Mayor Inday nga nanghinaut siya nga makatabang siya sa pagpataas sa dignidad ug pagprotekta sa katungod sa mga kaigsuonang Lumad of moro pinaagi sa mga Lumadnong balaod ug programa alang kanila.

Ikaduha nga bag-ong konsehal si Mambo-o diha sa SP tungod kay niadtong Oktubre nilingkod usab si Konsehal Jackson Reyes nga hulip ni Atty. Wendel Avisado nga ni-resign aron motrabaho isip pangabaga ni Vice President Jojimar Binay sa iyang housing commission. Si Reyes ug Avisado mga kusgang pundasyon sa PDP-Laban diri sa Davao ug subay sa balaod, taga partido ra usab nila ang ihulip kung may mo-resign nga elected officials. Congrats ninyo mga Honorables.