Roldan: Mga bag-ong konsehal kabahin sa solusyon 

Monday, January 16, 2012

GINAINGON nga kung wala kay lakang aron masulbad ang usa ka problema sulod sa 100 ka adlaw sa imong paghupot sa gahum nga makasulbad niini, nahimo ka nang kabahin sa problema. Sa samang paagi nga mamahimo ka nga solusyon sa problema kung may lakang ka sa kasulbaran niini.

Sulod sa niaging upat ka bulan, ang dakbayan sa Davao nakaangkon og duha ka bag-ong sakop sa konseho. Niadtong Oktubre 14, 2011, nihural si Jackson Reyes isip konsehal sa unang distrito ning siyudad hulip kang kanhi Konsehal Wendel Avisado nga ni-resign aron mo-ayuda kang Bise Presidente Jejomar Binay sa housing commission. Kung wala ako masayop, si Konsehal Reyes maoy napiling bag-ong Davao City chapter chairperson sa PDP-Laban samtang si Atty. Avisado nagpabiling lig-ong haligi sa maong partido. Subay sa Local Government Code of 1991, mahimong hulipan ang usa ka ni-resign nga elected government official sa kauban niini sa partido nga itudlo sa presidente sa nasud. 

Have something to report? Tell us in text, photos or videos.

Gibutyag ni Konsehal Reyes sa iyang paglingkod isip bag-ong sakop sa SP sa Davao nga himuon niya ang tanan aron makahatag og maayong serbisyo sa katawhan sa distrito uno ug sa tibuok siyudad. 

Usa sab niyang tahas mao ang pagpalig-on sa iyang politikanhong partido dinhi sa dakbayan aron mahimo kining kabahin sa kausaban ug solusyon sa mga problema ug gumonhap nga gisagubang sa mga yanong Dabawenyos. 

Sa laing bahin, niadtong niaging Martes, nanumpa si Berino Libayao Mambo-o, usa ka Datu sa tribong Ata-Manobo nga nanimuyo sa Mapula, Paquibato District, atubangan ni Mayor Sara Duterte-Carpio diha sa hawanan sa SP isip ika 27 nga sakop sa konseho ning siyudad. 

Siya ang unang representante ug tingog sa atong mga kaigsuonang Lumad ug Moro sa kasaysayan sa dakbayan subay sa probisyon sa Local Government Code. 

Sama kang Reyes, si Konsehal Mambo-o nagbutyag usab sa iyang tinguha nga makatabang sa pagpataas sa dignidad ug pagprotekta sa katungod sa mga Lumad ug Moro pinaagi sa mga balaudnon ug pag-implementar sa mga programa alang kanila. Gibutyag usab sa mga bagitong konsehal nga dili sila mamahimong kabahin sa kurapsiyon ug pag-abuso sa gahum kung tinuod man nga gibato karon sa konseho. Hinunoa, magpabilin silang solusyon sa problema inay nga kabahin niini pinaagi sa mga serbisyo ug pagpakigsandurot sa katawhang ilang giserbisyohan. 

Si Konsehal Reyes molibot sa mga barangay sa distrito uno nga maoy nipalingkod ni kanhi Konsehal Avisado samtang aktibong modumala sa mga komitiba nga gisangon kaniya sa SP. Sa laing bahin si Konsehal Mambo-o makighimamat usab sa tanang mga lideres sa Lumad ug Moro dinhi sa dakbayan aron paghiluna sa ilang mga prayoridad nga isang-at ngadto sa hawanan sa SP. Tahas usab niyang sulbaron ang mga hinanaling problema sa Lumad sama sa isyu sa kaugalingnan, yutang kabilin ug ang gitawag nga "Christmas migration" sa mga Lumad ug ang problema sa naglibot-suroy o "wandering Badjaos" ning atong siyudad. 

Manghinaut ang Notabene nga mamahimo kamong tinuod nga kabahin sa positibong solusyon sa problema sa SP ug sa katawhang kabus niining atong dakbayan.

Congratulations kaninyo ug dili kami mohikaw sa pagsaludo kaninyo mga Sir kung inyo kining matuman.