Roldan: Alternatibong medisina (2)

Monday, January 23, 2012

HAPPY Chinese New Year ninyong tanan! Sa niaging hugna sa Notabene, naghisgot kita og alternatibong medisina. Ang mga Intsik may dugay nang kasinatian sa paggamit og alternatibong medisina sa wala pa kining gitawag nato nga chemical-based nga tambal. Kasagaran nga ilang gigamit mao ang mga tanum o herbal nga ilang gisagol sagol sa uban pang mga tanum, minerals ug mantika.

Sa ila sab gikan ang acupuncture diin tusokan og dagom ang pipila ka parte sa lawas sa tawo aron mamaayo ang ilang balatian. Ang nakadiskubre sa acupuncture nakabantay nga mawagtang ang kalintura o sakit sa pasyente niini nga mga sundalo kung maigo sila sa pana o masamdan. Ilang nasayran nga may mga vital points ang tawo nga kung i-stimulate mawagtang ang sakit nga gibati.

Have something to report? Tell us in text, photos or videos.

May nakita ako kaniadto nga salida sa sine nga "Amazing China" nga gioperahan ang usa ka tawo sa iyang ulo nga way anesthesia kon dili usa lamang ka tusok sa gamay nga acupuncture needle sa iyang dalunggan.

Naglingkod og nagpang-os pa'g anagon ang pasyente samtang giabri sa mga doktor ang likod nga bahin sa iyang ulo. Naglingo-lingo lang kini sa dihang gipangutana kung duna ba siya'y gibatyagang kasakit sa operasyon. Busa dako pa gihapon ang wa nato masabti sa natad sa medical science mao nga makaingon ta nga may alternatibong medisina nga makaayo sa balatian sa tawo.

Sama sa giasoy ko sa niaging hugna nga gigamit ang thermal spine massage aron mabalik ang kahimsog sa lawas. Ang spinal cord man god ang tinubdan sa tanang ugat sa lawas. Diha pod gikan ang bone marrow nga nahimong dugo nga modagayday sa tanang parte sa lawas.

Namatay nga paralisado ang artistang si Christopher Reeves, ang bida sa salidang Superman, sa dihang nadislokar ang iyang spinal cord sa pagkahagsa niya sa kabayo. Wa magsilbi ang iyang minilyong salapi ug kaambungan. Mao nga nindot kung sulayan natong ampingan ang atong spine pinaagi sa thermal spine massage nga may lima ka paagi sa pag-ayo sa sakit sama sa pagmasahe sa atong spine, ang pag-align niini o chiropractic, naa sab ang acupressure, moxibustion ug paggamit sa infra-red light.

Kining tanan maagian matag 40 minutos nga sesyon sa Ceragem center diha sa Uyanguren. Halos tanang pasyente kay edaran ug sama usab nato, mga kabus nga way ikapalit og tambal o ikabayad sa doktor sa ospital.

May babayeng pasyente niadtong Biyernes nga dugay nang nag-dialysis kay ni collapse ang iyang kidney. Gibutangan na siya'g tubo sa kamot ug dili na makaila og tawo. Gidala siya sa iyang bana sa center ug sa ilang pipila ka adlaw nga pagbalik-balik, daw niarang-arang ang pamati sa babaye hangtud nga duha na siya ka bulan nga niundang sa pagpa-dialysis. Matud pa niya nga naay nipitik sa iyang kidney nga mora'g gibalikan na sa kinabuhi.

May pasyente sab nga edaran nga may prostate cancer. Pagkahuman niya'g mga sobra napulo ka sesyon, nakita sa ultrasound nga nigamay kini og halos 5 ka sentimentro. Wa pay labot niini ang daghang mga testimonya sa mga tawong na-stroke nga hinay-hinay nga naulian sa ilang mga balatian. Sulayi daw ninyo.