Day-off sa publikong sakyanan?

Saturday, January 28, 2012

MEDYO layo ang akong naabtan karong semanaha. Nibiyahe ako paingon sa Dipolog City ug milatas sa kadagatan padulong sa Dumaguete ug dayon padulong sa yutang batuon sa Bohol. Hastang kapuya tungod kay akong gi-proseso ang veterans claim sa akong nipanaw na nga amahan sa Philippine Veterans Affairs Office (PVAO) nga nangita og mga papeles nga ginamit ang National Statistics Office (NSO) security papers. Wa pa may computer sa unang panahon sa pagkatawo sa akong amahan nga 1913 busa gikuhaan ko siya og late birth registration kay nasunog sa giyera ang papeles sa Munisipyo sa Katipunan, Zamboanga del Norte.

Apan dili kini ang akong isugid kaninyo karon kon dili ang nakita ko sa Dipolog nga medyo swak pod tingali nga sun-on diri sa Davao kabahin sa pagdumala sa trapiko ilabi na sa nagkadaghan nga publikong sakyanan.

Have something to report? Tell us in text, photos or videos.

Ang ilang mga pedicab o tricycle adunay dagkong marka sa likod nga "DAY-OFF MONDAY". Naa poy "DAY-OFF THURSDAY" ug ubang adlaw.
Medyo nahimuot ako kay abi nako ang mga trabahante lang ang may day-off. Ang among kasambahay may day-off man matag Dominggo.

Ang tanang pamasaherong tricycle may marka hasta ang mga traysikad o di-tadyak sa atoa pa. Wa ko matagbaw sa akong nakita busa nangutana ako sa usa ka drayber sa tricycle kung unsay gipasabot niini.

Ingon niya nga may ordinansa ang Dipolog City nga nagsugo nga mag-day-off og usa ka adlaw ang tricycle aron makibhangan ang trapiko sa ilang siyudad. Matud pa niya nga sa wala pa ang day-off scheme, halos di moirog ang mga sakyanan nga magdasok sa dalan ilabi na sa panahon sa klase.

Dakpon ug pagamultahan ang mosupak niini kay halos tanang kanto sa Dipolog adunay pulis. Mora'g sa Iloilo ang tanang pusod ara pulis ug ang tanang pulis ara pusod.

Gagmay ug mugbo ang dalan sa Dipolog mao nga kinahanglang ayuhon niini ang pagdumala sa trapiko aron dili sila magsungag.

Ang Metro Manila adunay susamang paagi sa pagpagamay sa mga sakyanan sa kalsada nga Number Scheme. Ang kalainan lang niini ug sa Dipolog kay ang tanang sakyanang pribado ilang gi-regulate ug dili ang pangpubliko.

Gigamit niini ang last digit sa plaka sa sakyanan sama sa Odd Numbers nga 1, 3, 5, 9 o ang Even Numbers nga 2, 4, 6, 8.

Dili nimo magamit ang imong sakyanan kung ang plaka niini kay nabutang sa gidili nga number scheme sa maong adlaw. Karon lang ako nasayud sa susama niining scheme. Ambot kaha kung mosalir kini sa Davao sa pagbutang og Day-Off Sign sa mga sakyanang pampubliko aron makibhangan ang nagkadasok na nga trapiko sa dakbayan.

Puwede tingali eksperimentohan sa mga PD cab nga nagbiyahian sa sulod sa dakbayan aron sab dagko ang ilang kita sa ilang pamasada kay menus man ang kompetensiya gawas nga mokunhod usab ang gasto sa asiyete ug lana kay makapahulay man ang sakyanan usa ka adlaw matag semana.

Mo-menus sab gamay ang polusyon kay mokunhod man ang pagbuga sa tambutso. Kung masuta sa Traffic Management Center (TMC) nga OK ni, puwede tingali mo-eksperiment sab sa PUJ ug tingali padulong na sa mga pribadong sakyanan.