Roldan: Flavor of the road

Monday, January 30, 2012

MEDYO nabalaka ang tanan sa gibalita nga kontaminado ang mga pagkaon nga ginabaligya sa dalan. Magdala daw kini og sakit nga mananakod sama sa TB, hepatitis, cholera ug uban pa. Gikan daw kini sa mga de-kareton nga mga pagkaon sa kwik-kwik, barbekyu, laman-loob, fish-ball, ice cream, ug uban pa nga gibaligya diha sa mga bangketa o daplin sa kadalanan sa atong siyudad.

Kung mosuroy mo sa gabii sa dalang San Pedro ug kilid og luyo sa City Hall ug SP building imong makita nga naghitak nga flavor of the road. Way panumbaling ang mga tawo nga mopalit kay gawas nga barato, lamian pa gyud ang mga pagkaon nga ilang idalit.

Have something to report? Tell us in text, photos or videos.

Segundaryo sa katawhan ang isyu sa kontaminasyon kay nila pa way mabuhi nga mekrubyo sa nagbukal nga mantika sa karahay o sa nagbaga nga uling sa ilang sinugba.

Tiaw mong sa imong atubangan pa lutuon ang imong pagkaon nga paliton busa dead-ma lang ang kadaghanan sa maong balita. Si Mayor Sara nagbutyag nga bisan tuod may kamatuoran ang maong taho di siya makaako nga hikawan og panginabuhi ang libuan nga mga gagmay'ng negusiyante nga nagsalig lamang sa maong pangita.

Hinunua, hingusgan sa buhatan sa gobyerno nga luwas sa sakit ang ilang gibaligyang pagkaon ug nagsubay sa saktong pag-agi ang ilang pagprepara ug pagpamaligya sa pagkaon. Sutaon kon dili ba dubok o hugaw ang karne nga ilang gihimong barbekyu ug naggamit sila og limpiyong himan sa pagluto.

Ang kasagarang kontaminasyon diha sa paghikay sa pagkaon, dubok ug gitugdunan og langaw. Makakontamina usab ang pagpulpuli sa kutsara, tinidor ug plato nga dili mahugasan og tarong. Ang tawo nga may hepatitis dali rang makatakod sa uban kung di mahugasan ug masabonan ang kubyertos nga iyang gigamit. May pipila ka tindahan pa nga linuan lang sa balde ang ilang kutsara ug plato unya isawilik ang tubig aron mauga dayon butangan na usab og putahi sa laing kustomer. May mga sawsawan pod sa fish ball nga gilumotan na sa kadugay nga mao gihapoy tusloban sa mga kumakaon.

Duna pa gani magtiayon nga tigulang nga namaligya'g pagkaon nga klarong may sakit sa baga tungod sa pagpanigarilyo. Ambot kaha kung limpyo pa pod ang tubig nga ilang gigamit sa paghugas ug ipainom sa kustomer?

Busa angayang tabangan nato ang atong mga kaigsuonan sa pagpahibalo sa kakuyaw sa ilang pagpunay og kaon sa mga pagkaon sa bangketa.

Sa samang paagi sakto sab si Mayor Sara nga dili niya did-an ang pagpamaligya apan hingusgan niini ang pagbantay nga hygienic ang mga pagkaon ug ang pag-prepara sa pagkaon sa kadalanan.

Way kumo sa pag-amping. Kung mokaon man, seguraduhon nato nga kaila kita sa atong gipalitan. Kung mogamit man og kubyertos sa naninda, seguraduhong limpyo kini sama pagpabukal ug paghugas sa tubig nga may sabon. Mas maayo pod nga softdrinks o mineral water na lang ang imnong tubig.

Kung dili puwedeng dili mopalit sa bangketa lutuon pag-usab sa balay ang gipalit nga sud-an aron seguradong luwas. Mas maayo pa tingali kung mokaon na lang og balut aron segurado.