Roldan: 'Kuwerdas sa kalinaw'

Saturday, February 4, 2012

ADUNAY kanta ang sikat nga bandang Asin kaniadto nga nagkanayon, "Ang musika ang buhay na aking tinataglay, ito rin ang dahilan kung ba't ako'y naglalakbay." Ginaingon nga ang musika usa ka linguwahi nga wa moila og nasudnong utlanan o kulturanhong kinaiya. Linguwahi kini sa gugma, panaghigalaay ug kahiusahan sa tanang katawhan. Napamatud-an sa siyensiya nga ang musika makatabang sa kahimsog ug makapapiskay sa mga nagsubo. Ang mga Pilipino naila nga mahiligon sa musika, Dili pamilyang Pinoy kung walay karaoke o radyo nga nagtukar og mananoy nga awit. Way lami ang pasundayag sa TV ug sa entablado kung way musika. Busa niadtong Pebrero 2011 gi-host sa Tagum City ang 3rd International Rondalla Festival nga gitawag og "Cuerdas sa Pagkakaysa" (String of Unity) nga giapilan sa 26 ka mga rondalla troupe ug musikero sa 11 ka mga nasud sa kalibutan.

Gawas sa Pilipinas, niapil didto ang taga China, Thailand, Singapore, Taiwan, Mexico, India, Indonesia, Iran ug Russia. Karong Pebrero 11, ipasundayag didto sa Maniki, Kapalong, Davao del Norte ang First Invitational Rondalla Exhibition sa mga bata. Gitawag kini og "Kuwerdas sa Kapayapaan" (String of Peace) nga pagahimuon usab sa duha pa ka lugar sa Pilipinas.

Have something to report? Tell us in text, photos or videos.

Ang maong pasundayag gipaluyohan ni Mayor Edgardo Timbol sa Munisipyo sa Kapalong, sa Worldwide Filipino Alliance-Pangdaigdigang Alyansa ng Pilipino, Inc. (WFA-PAPI) ug ni George Gange, usa ka Pilipino nga nanimuyo sa Amerika nga nanghatag og mga instrumento sa rondalla sa kabataan sa nasud.

Si Gange nakatabang sa lima ka rondalla troupes dinhi sa Mindanao pinaagi sa WFA-PAPI nga moapil sa naasoy nga pasundayag diha sa bag-ong gym sa Barangay Maniki. Ang host barangay nakatukod usab og rondalla troupe nga gikan sa mga out-of-school ug street children nga naglibot-suroy sa maong lungsod. Buot "Kuwerdas sa Kapayapaan" nga ipasibaw ang baruganan, pangindahay ug pangandoy sa mga kabataan ug kabatan-onan alang sa kalinaw sa Mindanao ug sa tibuok nasud. Sayod kita nga nagpadayon ang kagubot dinhi tungod sa way panagsinabtanay ug pagrespetohay sa mga baruganan ug kultura. Gusto usab sa mga nagpasiugda nga ibalik-pukaw ang rondalla isip usa ka tradisyonal nga musikang Pilipino nga hapit nang nawagtang ilabi na sa bag-ong henerasyon karon.

Para kanako, angayan lamang nga atong suportahan ang susama niining mga kulturanhong kalihukan tungod kay kung dili kita molihok karon, segurado nga mawagtang na ang tradisyonal nga musikang Pinoy sama sa rondalla nga bisan tuod gikan kini sa kulturang Latino, nahimo nang tipik sa atong kultura ug kasaysayan.

Akong pasalamatan si Mayor Timbol ug ang iyang kapikas sa kinabuhi nga Punong Barangay usab sa Barangay Maniki sa pagdawat sa bug-at nga tahas sa pag-isponsor sa Mindanao leg sa "Kuwerdas ng Kapayapaan" sa Pebrero 11.

Lakip usab nga pasalamatan ang WFA-PAPI, usa ka non-governmental organization nga nagtumong sa pag-organisa sa mga OFWs ug Pinoys Abroad (PinoysAb) alang sa Pilipinas. Magpasalamat usab kita kang George Gange ug sa mga susamang PinoysAb nga nagpabiling nagmahal sa nasud pinaagi sa pagbuhi sa kulturang Pinoy sama sa rondalla ug pagdasig sa mga kabataan nga makakat-on sa paggamit og instrumento sa musika ug pagmahal sa atong kultura.