Roldan: K to 12 magsugod na?

Monday, February 6, 2012

MORA'G di na kapugngan ang programang K+12 sa Department of Education (DepEd). Seryuso na kining ipatuman bisan sa nagpungasi nga batikos nga naani niini gikan sa daghang sektor sa katilingban. Sumala pa sa akong nasayran, compulsory na ang Kindergarten sa tanang bata nga motungha sa Grade 1 ug dugangan sab og mga tuig ang pagtungha sa high school. Sa pagkakaron, puwede motungha ang bata sa Grade 1 basta moabot na kini sa pangedaron og 6 o 7 anyos. Matud pa sa DepEd nga kung matuman kini, nisunod na kita sa international standards sa gidugayon sa pagtungha.

Ang duha daw ka tuig sa senior high school gamiton sa mga bata nga makaangkon og kahanas sa industrial trade nga accredited sa TESDA ug puwede na siyang makatrabaho dinhi o gawas sa nasud. Sa among panahon gitawag kini og Industrial Arts diin gitun-an kami sa paghimo'g mga produkto gikan sa mga butang sa palibot ginamit ang mga himan sa shop.

Have something to report? Tell us in text, photos or videos.

Apan kadtong interesadong motugtog og instrumento sa musika didto mosulod sa music class. Nindot man nga andamon sa gobyerno ang atong mga kabataan sa ilang ugma kay mao man gayud kini ang iyang papel. Ang edukasyon mahimo sa bata nga gabay ug instrumento nga makab-ot niya ang iyang tinguha sa kinabuhi. Unta sa una nang daan nga giusab ang kurikulum sa eskuwelahan aron seguradong may trabaho ang tanang mo-gradweyt sa high school di sama karon nga nangalata sa kadaghan sa pipila ka kurso nga way trabaho nga masudlan. Ang atong mga nurses didto na lang tawon nagtrabaho sa call centers, nahimong mga clerks sa insurance companies ug tindera sa mga tindahan. May uban nga nagmantiner na lang tawon nga mga Job Order o contractuals nga staff sa mga konsehal sa lokal nga gobyerno. Suwerte ang daghang nahuman kay puwede siyang mo-ambak ambak og trabaho. Ang nakaparat pa kay hangtud lima lang ka bulan ang trabaho tungod sa kontraktualisasyon. Kung wa makaangay ang employer nimo, ayaw na lang paghandom nga ma-regular pa bisan pila ka na ka tuig sa trabaho. Mao kini ang pipila ka rason nganong daghang nibatikos sa agenda sa gobyerno sa edukasyon ug panarbaho. Tas-an kuno ang tuig sa pagtungha sa bata apan way kasegurohan gihapon sa pagtrabaho niya sa umaabot.

Gawas niini, wa pa matubag sa gobyerno ang problema sa di maayong kalidad sa pagtudlo, kakulangon sa mga eskuwelahan, libro ug pasilidades niini. Apan sa laing bahin nakadayeg ako sa advance enrollment sa mga bata sa Kindergarten. Mas maayo kini aron malikayan ang pagdasok sa mga bata ug ginikanan nga sagad natong makita sa panahon sa enrollment. Unta naay ingon niini sa high school ug college aron less stress sa pagpa-enroll.

Promotion sa mga kawani

May balita nga niguwa na ang promotions sa mga kawani sa lokal nga kagamhanan sa siyudad ilabi na sa City Health Office. Nindot karong panahona kay walay palusot ug padrinohay sa sulod kon dili gibasi ang promotions sa kuwalipikasyon, abilidad ug kinaiya sa empleyado. Sakto sab nga gihulipan dayon sa siyudad ang mga kawani nga nahawa ug niretiro. Congrats sa na-promote!