Genoguin: Nganong miatras man ang Herhof?

Thursday, February 9, 2012

SA dili madugay kulangon na daw kita sa enerhiya karong tuig 2013. Timailhan niini, gitugtan na sa atong Konseho ang pagtukod og Coal Fired Power Plant sa Binugao, Distrito sa Toril para dili kita mawad og kuryente inig-abot sa tukmang panahon.

Agig dugang, ang programa ni Mayor Inday Sara Duterte, iyang namatikdan nga dako'g ikatabang ang atong nagtipon-og nga basura sa siyudad nga mahimong makadugang sa atong panginahanglan sa enerhiya. Pinaagi niini, nakiglambigit ang atong kagamhanang lokal sa usa ka dakong kompaniya didto sa Germany nga mohimo og joint venture sa Waste to Energy (WTE).

Have something to report? Tell us in text, photos or videos.

Pero ang dakong pangutana, nganong miatras man ang Herhof? Unsay milagro nga nagpaluyo? Wala pa gani sila makasugod sa US$1 bilyon nga kantidad sa maong proyekto nag-withdraw dayon? Dugang pa, migasto na ang atong panudlanan sa siyudad og dolyar para sa atong duha ka konsehal nga sila si Arnulfo Cabling ug Marissa Salvador Abella pag-adto sa Germany alang sa maong katuyoan.

Okay, kon educational trip lang ang ilang tuyo, no problem. Pero nganong didto man gyud sa Germany nga duna may duol kaayo nga lugar nga mao ang Kagoshima Japan? Sa wala pa molarga ang duha ka konsehal, mora'g luto na daan ang transaksiyon tali sa City Government of Davao ug Germany. Gani, gi-esplikar man nilang duha ang resulta sa ilang biyahe pag-adto nila sa Herhof Company sa Germany.

Matud sa atong halangdong Bise Mayor Rody Duterte, wala kunoy kurapsiyon ang pag-atras sa Herhof sa US$1 bilyon nga proyekto. Okay ra kay wala may kuwartang nawala sa atong siyudad. Pero kadiyot lang, wala kahay sekreto nga dunay nangayo sa Herhof aron madali ug makalusot gilayon ang maong proyekto? Nangutana lang.

Ang San Miguel Corporation bitaw wala pa man sad makasugod sa ilang proyekto, pero mi-atras dayon ug sa ngadto-ngadto mihungaw na nga ang dakong hinungdan duna diay mga konsehal nga nangayo'g dakong kantidad sa salapi aron lang mahinayon ang ilang proyekto nga dinhi unta sa atong dakbayan tukoron. Karon tua na sa Sta. Cruz Davao del Sur. Dili kaha pareho kini'y nga kaagi?

Panahon lang ang motug-an sa tinuod. Hinaut nga walay mohungaw nga balita sa umaabot nga adlaw tungod kay alang kanako imposibleng mo-atras ang usa ka higanteng kompaniya sa transaksiyon tungod kay business man ang ilang gipangita.

Karon pa ba ta sa atong mga konsehal? Kaniadto pa na sila nalambigit sa mga pangilkil. Maayong laki lang kay wala ma'y ebidensiya, dili ba mga Honorable? Puwera delos buenos lang.

Paminawa ang "KONTRA BALANSE" sa DXKT 1071 Khz, alas 7 hangtud 9 sa buntag, matag Lunes hangtud Sabado ug ang RPN Visayas-Mindanao koneksyon.