Villareal: Ang buhing kabilin ni Nanay Soling

Thursday, February 9, 2012

NAGBANGUTAN karon dili lamang ang pamilya sa mga Roa ug Duterte sa dihang mipanaw sa edad nga 96 anyos ang inahan sa atong Bise Alkalde Rody Duterte ug apohan ni Mayor Inday Sara ug Konsehal Polong Duterte, ang tulo ka lig-ong lider sa dakbayan sa Dabaw. Wala paabta og 24 oras, gilayong giplastar ang patay'ng lawas ni Soledad Roa Durterte, asawa ni anhing Vicente Tete Duterte nga una nang mipanaw.

Pinaagi sa tulumanon nga "Ato ni Bay" kaniadtong Martes sa Sangguniang Panlungsod gi-esplikar sa bise mayor nganong wala na gihaya si Nanay Soling aron unta kahatagan og higayon ang mga paryente, higala ug mga sumusunod sa pamilya nga makasud-ong sa katapusang higayon sa pisikal nga lawas sa giilang Nanay sa tanang Dabawenyo.

Have something to report? Tell us in text, photos or videos.

Matud ni VM Rody nga gihimo nila kini subay lamang sa kagustohan ni Nanay nga wala nay garbong haya nga mahitabo. Buot pasabot nga wala na gisubay sa sagad nga tradisyong Kristiyano ang paghaya ni Nanay.

Gi-cremate siya. Buot pasabot gisunog ang lawas apan wala gisulti sa bise mayor kon kinsa ug asa gipahimutang ang iyang abo. Tungod niini, nagpaabot sa iyang dispensa ang pamilya Roa-Duterte sa katawhan nga buot mosaksi sa haya ni Nanay. Dili kini ilang kabutbut-on apan tugon kini sa mitaliwan nga si Nanay Soling.

Gipasabot ni VM Rody nga kini gayud ang tradisyon nilang pamilya nga dili magpasigarbo. Gani matud niya nga bisan kuno siya kung kuhaon na ang iyang hinulamang kinabuhi gusto niya kalimtan siya ug dili na handumon ang iyang mga nahimo (ma-maayo man o dautan).

Bisan kang mayor Inday Sara wala kita makadungog nga sa matag adlaw niyang natawhan dunay magarbuhong selebrasyon.

Unta ingon niini ang mentalidad sa mga politiko nato aron minus ang gubot.

Karon gitaral si Chief Justice Renato Corona pinaagi sa impeachment ug ang kaso nanukad sa statement of asset, liabilities and net worth kun SALN. Gusto man ang uban nga magarbo ang kinabuhi aron ilhon sila sa taas nga ang-ang sa sosyudad nga dili nila mahatagan og katin-awan gi-unsa nila kini pag-angkon.

Ang politika dili dautan kon ang politiko wala magbinuang, gigamit unta nila ang politika diha sa pagpadagan sa gobyerno. Ang politika pamaagi lamang aron dalhon sa mga lider ang ilang katawhan sa usa ka hut-ong nga sibilisado. Apan ang nahitabo karon sa mayoriya sa mga politiko, gigamit nila ang politika aron sila makabaton og bahandi, gahum ug garbo.

Ang maayong politika sa dakbayan sa Dabaw mao ang kabilin ni Nanay Soleng sa iyang mga anak ug sa mga Dabawenyo. Alang kang Nanay Soleng....maayong pagpanaw ug dili namo makalimtan ang imong gipaambit nga kaayohan.

(Paminawa ang tulumanong Serbisyo Para sa Masa sa dxRD 711 Khz, matag alas 9 hangtud 10 sa buntag, Lunes hangtud Biyernes.)