Editoryal: Constitutional crisis

Friday, February 10, 2012

NABALAKA karon ang mga senator-judges nga makasinati ang nasud og “constitutional crisis” sanglit nanghilabot na ang Korte Suprema sa impeachment trial ni Chief Justice Renato Corona.

Tinuod nga mabalaka kita ning hitaboa tungod kay di man malikayan ang pagsilaob unya sa kagubot kon magbangi ang tulo ka mga sangang buhatan sa gobyerno.

Have something to report? Tell us in text, photos or videos.

Mga senador nangatarungan nga sila ang labing gamhanan isip Impeachment Court subay sa Konstitusiyon, apan subay sa naandan, ang Korte Suprema maoy dunay gahum nga mokoreher sa legislative ug executive departments.

Ning hitaboa, nabahin ang panghuna-huna sa katawhan. Bisan gani ang mga legal experts, nabahin sab ang ilang opinyon sa nahitabo.

Wa kita masayud kon unsa karon ang lakang nga himuon sa Senado ning pagpaguwa og Temporary Restraining Order sa Korte Suprema.

Ang tumong sa TRO mao nga pugngan ang Impeachment Court nga utingkayon ang deposito sa bangko sa punong mahistrado -- butang nga nakapabalaka sa mga Pilipino.

Dali sab kaayong mitubag ang Malakanyang nga way mahitabong constitutional crisis sanglit maayo ang pagpadagan sa punong ehekutibo.

Maayo kaha kini nga tilimad-on?

Nahinumdom kita nga namulong si Corona sa wa pa magsugod ang pagtaral sa kaso nga di siya mahadlok sanglit di tinuod ang akusasyon kaniya sa Kongreso. Kon tinuod man nga inosente siya, nganong di man niya ipautingkay ang iyang dollar deposits sa bangko?

Di ikalimod nga “midnight appointee” si Corona sa miaging administrasyon mao nga init gayud ang dugo sa atong pangulo ug sa iyang mga kaalyado.

Ang nahitabo sa atong nasud bunga sa pulitikanhong pagmaneobra. Hinaut nga kakuhaan unta kini og maayong pagtulun-an sa nagdala sa renda sa atong gobyerno!