Roldan: Walang hanggang paalam, Nanay Soleng

Saturday, February 11, 2012

ADUNAY mahinuklugon nga kanta ang Dabawenyong si Joey Ayala sa Bagong Lumad niadtong 1990's nga nagkanayon, "Ang pag-ibig natin ay walang hanggang paalam. At kahit magkalayo'y papalapit pa rin ang puso. Kahit na magkahiwalay, tayo'y magkasama. Sa magkabilang dulo, nang mundo."
Dugang pa, "Ang bawat simula ay mayroong katapusan. Sana'y bigyang laya ang isa't-isa."

Giawit kini sa mga militanteng aktibista kaniadto isip pahinungod nila sa ilang mga kauban, hinigugma o mga mahal sa kinabuhi nga mosampa na ngadto sa kabukiran aron isulong ang kawsa sa ilang kalihukan.
Ginakanta usab kini sa panahon sa haya o sa pagbiyahe sa higala ngadto sa laing kalibutan.

Have something to report? Tell us in text, photos or videos.

Para kanako tukma lamang ang maong awit ngadto sa giilang inahan sa Davao nga si Nanay Soledad Roa Duterte nga nipanaw na padulong sa atong Amahan sa langit sa mabugnaw nga kaadlawon niadtong Pebrero 5 didto sa Davao Doctors Hospital.

Wala dugaya ang haya sa iyang inahan kay matud pa ni Vice Mayor Rody Duterte nga buot sa iyang inahan nga dili dugayon ang pagtukaw kaniya hinunua ipa-cremate ang iyang patay'ng lawas ug ibubo ang abo ngadto sa mga lugar nga iyang gihinganlan na daan.

Kung papilion ako og pangalan nga may pinakadakong nabuhat sa progreso sa Davao, dili ako magmakuli pagsulti nga si Nanay Soleng kini.

Gawas nga nahimo siyang first lady sa iyang bana nga si Governor Vicente Duterte sa undivided Provinces of Davao, nakapalutaw pa gayud kini og duha ka Mayor sa siyudad nga nagdala og talagsaong kalamboan ug progreso nga dili hilabwan sa nangaging pamunoan.

Gawas niini, giila usab si Nanay Soleng nga "icon of democracy" tungod sa iyang pagpangulo sa "Yellow Friday Movement" sa dekada 80 ug sa daghan pang mga grupo nga naghandom og kausaban sa nasud.

Di nako malista ang tanan niyang nahimo apan ang pagka-Datu Bago Awardee niya niadtong 2007 nag-ila lamang sa iyang talagsaong tampo sa kaugmaran sa Davao.

Gikan sa pagkamagtutudlo, nahimo siyang inahan sa daghang kalihukan alang sa mga kabataan ug kabatan-onan, pagtukod sa Museo Dabawenyo, Davao Beautiful, Womenet, Konsumo Dabaw ug uban pa.

Nakahinumdom ako nga gitigum ni Nanay Soleng ang mga iladong aktibista diri sa Davao sama sa mga abogadong si Sammy Occena, Tony Arellano, Larry Ilagan, Doming Carillo ug Safiro Respicio, manunulat nga si Alexander L. Orcullo, student leader nga si Danny Dayanghirang ug uban pa.

Busa niadtong Martes nagpahigayon ang mga cause-oriented groups og sama sa "Luksang Parangal" didto sa MTS. Usa usab nga adbokasiya ni Nanay Soleng ang kinaiyahan busa gitukod niya ang SRD organic center didto sa Binugao, Toril ug sa Marahan, Marilog District samtang giduso usab niya ang paggamit og renewable energy.

Mora'g dako ang impluwensiya ni Nanay Soleng kang Mayor Sara sa iyang baruganan kabahin sa pagprotekta sa kinaiyahan sama sa pag-veto niya sa ordinansa sa coal-fired power plant sa Binugao. Nagpadangat usab sa kasubo si kanhi kongresista Benedicta "Leling" Roa, biyuda ni kanhi Misamis Oriental Governor ug Mayor Pedro "Oloy" N. Roa, Sr. nga iyang paryente sa Cagayan de Oro. Padayon sa pagpanaw ug salamat Nanay Soleng.