Editoryal: Baruganan vs boto

Sunday, February 12, 2012

NABAHIN karon ang tanang sektor sa katilingban sa dagan sa impeachment trial sa Senado batok Supreme Court Chief Justice Renato Corona.

Di lang mga legal experts ang nabahin, apan nabahin sab ang mga relihiyosong pundok human gipaguwa sa Korte Suprema ang Temporary Restraining Order (TRO) nga nagpugong nga utingkayon ang dollar deposits sa punong mahistrado.

Have something to report? Tell us in text, photos or videos.

Ang ubang sekta nagpadayag nga mas maayong utingkayon ang bank deposits ni Corona, samtang ang uban naghangyo nga tumanon sa Senado ang TRO.

Ang Catholic Bishops' Conference of the Philippines (CBCP) nagkanayon nga mas maayong hunungon ang impeachment trial sanglit maapektuhan niini ang ekonomiya sa nasud.

Gisugyot niini nga mas maayong ipadayon nalang ang kaso ni Corona sa korte ug silotan siya kon mapamatud-an nga duna siyay dautan nga binuhatan.

Ang nakanindot niini kay andam nga ipakita ni Corona ang iyang dollar deposits sa tamang panahon. Dinhi unya nato masayran kon diin niya gikan ang mga dolyares nga gitipigan sa bangko.

Wa pa kita masayud kon unsa ang mga ebidensiya nga ipresenta unya sa defense panel ni Corona nga gisuportahan karon sa pundok sa Iglesia ni Cristo.

Suma sa Malakanyang nga wa sila mahadlok sa suporta sa INC. Ang pangutana, wa kaha nahadlok ang mga Senator - Judges nga magpapili karong 2013 eleksiyon?

Nasayud kita nga dunay block voting ang INC nga nakapadaug kanila sa miaging eleksiyon.

Ang mga opisyal nga buot mataktak si Corona pulos mga politiko. Mosugot kita o dili nagkinahanglang sila og boto. Basin ang ilang lig-on nga baruganan, mahimo unyang huyang tungod sa boto!