Genoguin: Impeachment Court labaw ba sa Supreme Court?

Sunday, February 12, 2012

HAPIT na mag-usa ka bulan ang atong gisundan nga impeachment trial batok kang Chief Justice Renato Corona, pero wala pay tima-ilahan kon madutlan ba siya sa mga akusasyon gikan sa prosecution sa walo ka artikulo nga gipasangil ngadto kaniya.

May mga saksi nga gipresentar sa mga nag-akusa pero palpak daw kay walay “briefing”. Sama pananglit sa Presidente sa PSBank nga si Mr. Garcia, walay kapuslanan ang iyang pagtungha didto sa Impeachment Court kay inay mopabor siya sa prosecution panel, ang nahitabo walay nakuha sa iyang pagtestigo kay bisan gani sa peso account deposit ni Chief Justice Renato Corona, nagdumili pa siya sa pagbutyag, kung wala usa-usaha pagbasa ni Senate presiding Judge Juan Ponce Enrile ang mga account numbers, dili gyud siya moangkon.

Have something to report? Tell us in text, photos or videos.

Ang Republic Act 1405 nga mas naila nga "Bank Secrecy Law" adunay exemption. Puwedeng halungkaton ang imong deposito sa bangko hangtod sa katapusang centavo, kon kini gamiton nga ebidensya sa impeachment trial.

Tingali, may katarungan ang Presidente sa PSBank nga dili ug dili gyud niya ibutyag ang depositong dolyares ni CJ Renato Corona tungod kay mao kini ang unod sa Republic Act 6426 kun Foreign Currency Deposit Act, nga bisan pag adunay kasong impeachment ang depositor, dili puwedeng gamitong ebedensya, gawas lamang kong may pagtugot gikan sa depositor.

Angayan lang siguro nga irespeto sa mga Senate Judges ang Republic Act 6426 kay sila man ang nagpanday niini, ug tama lang ang Korte Suprema sa ilang pagpagaws og Temporary Restraining Order (TRO). Sa atong panglantaw morag adunay probisyon sa atong Constitution nga dapat amendahan. Ngano? Pamati sa Senate Impeachment Court nga labaw sila karon og gahum sa Korte Suprema tungod kay punong mahistrado ang ilang gi-impeach, butang nga wala sa atong batakang balaod.

Oras na nga atong amendahan ang Constitution aron aduna kitay panig ingnan kon "jurisprudence"sa susama niining mga panghitabo. Atong hatagan ug supreme power ang Senate Impeachment Court nga labaw pa sa Korte Suprema sa panahon nga adunay impeachment trial.

Karon naglibog nata pag-ayo. diba? Chief Justice sa Korte Suprema ang gi-impeach, unya didto pud modangop ang mga Senator Judges kon interpretasyon sa balaod ang hisgutan? Gikataw-an lang sa mga mahistrado ang impeachment trial karon sa Senado, labi pa nga ang mga testigo wala say klaro.

Paminawa ang "KONTRA BALANSE" sa dxKT 1071 Khz alas 7 hangtod alas 9 Lunes hangtod Sabado.