Dura: Nagpakabana

MAKAPAHINUKLOG ang pahayag ni Mayor Sara Duterte-Carpio nga nagkanayon nga wa pa kita makalingkawas sa kontrol sa mga higanteng nasud.

"Sa mga Espanyol makaingon ko nga independent na ta, pero sa mga Americans -- ambot lang," suma sa mayor atol sa press briefing sa City Hall niadtong Lunes.

Tinuod ang gipamulong sa mayor nga nakalingkawas na kita
sa mga Espanyol nga misakop sa mga Pilipino sud sa 400 ka katuigan.

Human sa gatusan ka katuigan sa kamot sa mga Espanyol, gidumala na sab kita sa langyaw nga adunay dakong interes sa abundang bahandi sa atong nasud sama sa America ug Japan.

Natapos ang ilang kontrol human sa ikaduhang gubat sa kalibutan. Di na kita direktang kontrolado sa America. Gipasagdan na ang gobyerno nga maoy mopadagan sa politikanhong kalihukan sa atong nasud!

Bisan wa na gipalawman sa mayor ang iyang pamahayag, apan masabot nato nga iyang gitumbok mao ang kanunay nga pagsalig sa atong gobyerno sa Estados Unidos.

Di man sayop ang pagpakighigala sa ubang kanasuran subay sa International Law, apan ang di maayo mao nga kanunay nalang kitang maghangad sa tabang sa uban.

Niadtong miaging semana nangayo og tabang ang atong pinangga nga Pangulong Benigno Aquino III kang United Kingdom Prime Minister David Cameron ug US President Barrack Obama.

Maayo ang maong lakang sanglit mokusog ang relasyon sa mga lider, apan di tingali maayong kanunay kining himuon tungod kay di kita makabaton sa tinuod nga kagawasan ug kaugalingnan.

Di na unya kita makabarog sa kaugalingong paningkamot kay nagsalig man lagi kita sa uban nga moagak kanato panahon sa kalisdanan.

Gisaulog kagahapon ang 114th Independence Day sa Pilipinas!

Ato untang ipasigarbo nga daw langgam kita nga nakaikyas sa hawla ug milupad ngadto sa kawanangan aron makaplagan ang tinuod nga kagawasan.

Ang reyalidad karon mao nga 'dependent' kita sa ubang nasud sama nalang sa pagsulbad sa bangi tali China. Midangop kita sa United Kingdom ug Amerika!

Tungod niini, gipakusgan ang Balikatan Exercises nga alang ni Vice Mayor Rody Duterte, makapasamot kini sa tensiyon tali China ug Pilipinas.

Dunay kamatuoran ang obserbasyon sa bise mayor tungod kay halos tanang nasud nga gihilabtan sa Estados Unidos -- daghang kinabuhi ang nakalas sama sa nahitabo sa Afganistan.

Ang tinuod nga kaugalingan mao ang pagpadagan sa usa ka nasud sa kinaugalingon nga pamaagi nga di mag-agad sa manipulasyon sa uban.

Angay nga magbantay kita kay basin unya kon ang solusyon sa uban dunay nagpahiping interes nga ang tinguha kaalautan sa nasud nga Pilipinhon.

Usbon ko, di dautan nga mopailawom kita sa International Law, apan ang di lamang maayo nga magpakaitoy na lamang kita sa mga heganteng nasud!