Dura: Asa magpatambal ang mga kabus?

KADAGHANAN kanatong mga Pilipino mas interesado pa kitang naghisgut sa kontrobersiyal nga away ni Manny Pacquiao ug Timothy Bradley niadtong miaging semana, apan maihap lang sa mga tudlo ang naghisgut sa kontrobersiyal nga House Bill 6069 kun Hospital Corporatization Bill.

Ang maong balaudnon giduso ni Bacolod Representative Anthony Golez Jr.

Nahimo kining kontrobersiyal tungod kay gidali-dali sa mga kongresistang pabor nga himuong pribado ang 26 ka mga publikong ospital sa nasud.

Usa na dinhi mao ang Southern Philippines Medical Center (SPMC) nga maoy gisaligan sa mga kabus nga masakiton gikan sa nagkadaiyang lugar sa Davao Region, Caraga Region ug Central Mindanao.

Niadtong Sabado (Hunyo 23), dunay gihimong round-table discussion ang sektor sa kababaehan sa People's Park bahin sa HB 6960.

Ilang gituki ang maong balaudnon nga alang kanila usa ka anti-women ug anti-poor nga balaod tungod kay mahimo na unyang pribado ang mga ospital nga gipadagan sa gobyerno.

Alang sa mga kongresista nga misuporta sa maong balaudnon, nindot kini tungod kay dunay kaugalingong otonomiya ang publikong ospital sa pagpatuman sa mga income generating services ngadto sa mga adunahang pasyente.

Ang kita unya niini, suma nila, magamit sa pagtabang sa mga kabus nga pasyente. Ang pangutana, matuman kaha kini?

Ang tinguha nga pagpribado sa mga publikong ospital kabahin sa Private-Public Partnership Program sa administrasyon ni Pangulong Benigno Aquino III.

Ilawom ning maong programa, hinay-hinay nga wagtangon sa gobyerno ang kontrol sa mga publikong ospital, state universities ug water utilities.

Ang katuyuan niini mao nga hatagan og higayon ang mga pribadong magpapatigayon nga mobubo og kapital sa mga publikong ospital aron monindot ang serbisyo.

Ang kapitalista maoy molingkod unya sa board of trustees.

Ug dayag nga ang mga polisiya nga ipatuman nila mao kadtong motubag sa ilang interes aron mabawi ang ilang kapital.

Base sa akong kasinatian isip Liaison Officer sa Lingap Para sa Mahirap Program kaniadto, maglisud man gani ang among mga pasyente sa pagpalit og dextrose nga gipadagan pa sa gobyerno ang SPMC, unsa pa kaha kon mahimo na kining pribado?

Ug kining nahitabo karon, subay sa among subject nga Philippine Public Fiscal Management sa Master in Public Administration, usa kini sa mga structural adjustment programs nga gipatuman aron masigurong makabayad kita sa utang (foreign debts) nga mikabat na sa 5-trilyon pesos.

Kon maaprubahan kining maong balaudnon, asa naman unya magpatambal ang mga kabus nga masakiton, Noy?