Editoryal: Makamatay nga balaudnon

MAKABUNGOG sa pandungog sa mga pasyente, empleyado, doktor ug opisyales sa Southern Philippine Medical Center (SPMC) ang gihimong protesta sa mga militanteng pundok kagahapon atubangan sa maong tambalan sa Bajada, siyudad sa Davao.

Tumong sa ilang protesta nga babagan ang kontrobersiyal nga House Bill 6069 kun Hospital Corporatization Bill nga giduso ni Bacolod Representative Anthony Golez Jr.

Nagprotesta sila tungod kay gidali-dali sa mga kongresistang pabor nga himuong pribado ang 26 ka mga publikong ospital sa nasud.

Usa na dinhi ang SPMC nga maoy dangpanan sa mga kabus nga masakiton gikan sa nagkadaiyang lugar sa Davao Region, Caraga Region ug Central Mindanao.

Alang sa mga kongresista nga misuporta sa maong balaudnon, nindot kini tungod kay dunay kaugalingong otonomiya ang publikong ospital sa pagpatuman sa mga income generating services ngadto sa mga adunahang pasyente.

Ang kita unya niini magamit sa pagtabang sa mga kabus nga pasyente. Ang pangutana sa mga misupak niini, matuman kaha ang maong saad?

Bisan si Jonathan Placido, presidente sa National Department of Health Employees Association, di pabor sa balaudnon. Alang nila, alaut unya ang mga empleyado sa ospital kay mawad-an na og trabaho ug labaw sa tanan ang mga kabus nga masakiton kay pribado naman ang mopadagan niini.

Ang maong balaod, alang kanila, nagkahulogan og kamatayon sa mga kabus nga masakiton.