Dura: Benepisyong makapasmo!

MITIYABAW na ang mga public health workers sa tibuok nasud tungod kay wa mahatag kanila ang ilang benepisyo sama sa hazard pay ning tuiga.

Mao kini ang hinungdan nga dunay mga lihok protesta nga gihimo ang National Department of Health Employees Association (Nadea).

Ang Nadea maoy gipasakopan sa mayorya sa 33,295 ka mga health workers sa nasud nga giputlan sa ilang benepisyo sukad niadtong Enero 2012.

Ang hazard pay, subsistence allowance ug laundry pay nahasubay sa Republic Act 7305 kun Magna Carta for Public Workers. Apan, sa pagsud ning tuiga, giputol ang maong benepisyo mao nga nagprotesta sila.

Ang hazard pay, base sa 25 porsiyento sa binuwan nga sweldo sa health workers nga nagdawatan lamang og salary grade 19 paubos ug 5 porsiyento alang sa mga dunay salary grade 20 pataas.

Alang kanako, angayan gayud nga modawat ang mga public health workers sa maong benepisyo sanglit risgo kaayo ang ilang trabaho.

Di lalim ang ilang kahimtang nga mosaka sa hilit nga lugar aron lang maserbisyohan ang katawhan. Kuwang pa gani kini kon buot huna-hunaon alang sa mga health workers nga sinsero nga nagtrabaho sa bukid. Nganong giputol man kining maong benepisyo, Secretary Enrique Ona?

Ug tungod sa nahitabo, makaingon kita nga tinuod ang giyawyaw nila nga ang benepisyo sa gobyerno makapasmo!

Tinuod kini nga eksperiyensiya sa sama namo nga co-terminus employees sa gobyerno kaniadto. Mosaka sa bukid nga way allowance. Personal namong kuwarta ang gigasto. Apan, amo amang kadtong giantos tungod kay anaa sa among kasing-kasing ang tinuod nga serbisyo publiko.

Tingali, masabtan kini sa mga tinuod nga public servants. Apan, alang ngadto sa mga empleyado sa gobyerno nga naanad nang modawat sa dagko nga allowances -- di gayud kini maayo!

Sama pananglit sa mga opisyal nga akong nahimamat niadtong miaging semana nga nahiubos sa usa ka kompanya nga wa mihatag kanila og honorarya isip speaker sa ilang training seminar.

Alang nila, di lalim ang ilang trabaho sanglit talagsaon ang ilang abilidad sa pagpasabot sa responsibilidad sa gobyerno ug kompanya (vis-a-vis) mao nga angay lamang silang modawat og honoraya.

Yuna pa, Sir, nganong mangayo man mo og honorarya nga gisuweldohan man kamo sa inyong trabaho? Gawas pa niini, duna man kamoy allowances gikan sa inyong opisina. Di man sab lisud ang inyong kahimtang kay dia ra man mo sa siyudad!

Lisud kining matang sa kinaiya tungod di na motrabaho kon way honorarya.

Nahimo usab akong empleyado sa gobyerno kaniadto, apan wa mahitabo nga midawat ako og honorarya isip bayad sa akong kahago sa pagtabang sa mga tawo.

Kontento na ako sa sweldo nga gibayad kanako gikan sa buhis sa mga tawo!