Roldan: Giyera batok malnutrisyon nagpadayon

ANG malnutrisyon o kakulangon sa kahimsog sa tawo, ilabi na sa mga bata maoy usa sa mga nag-unang modernong problema sa kalibutan.

Mao nga niadtong 2000, nagkasabot ang United Nations (UN) nga magtakda og walo (8) ka kab-utonon o tumong sa kalamboan sa katawhan sa kalibutan hangtud sa 2015.

Gitawag kini og Millennium Development Goals (MDG) nga gipirmahan sa 193 ka estado sa kalibutan og 23 ka UN agencies.

Ang Goal 1 mao ang pagwagtang sa tumang kapobrehon ug kagutom. Gisundan kini sa Goal 2 nga makab-ot ang universal primary education sa mga bata; ang Goal 3 mao ang pag-promote sa gender equality ug pagpagahum sa kababayen-an; ang Goal 4 mao ang pagpakunhod sa pagkamatay sa mga bata; ang Goal 5 mao ang pagpalambo sa kahimsog sa mga inahan; ang Goal 6 mao ang pagkombati sa HIV ug AIDS, malaria ug ubang sakit; ang Goal 7 mao ang pagseguro sa malahutayong kahimtang sa kinaiyahan; ug ang Goal 8 mao ang paglig-on sa pangkalibutanong pagtinabangay alang sa kalamboan.

Kagahapon atong nadunggan ang ika-3 nga SONA sa administrasyon ni PNoy ug atong nasayran ang ilang gibuhat aron makab-ot kining MDG alang sa mga Pinoy ilabi na nga hapit na nahuman ang deadline niini nga 2015.

Daghang nadismaya sa SONA sa pangulo kay ga-noynoying ug nagduka daw kini ug di makab-ot ang tanang nalatid sa MDG. Bisan tuod may kongkretong lakang ang administrasyon sa pagsumpo sa kurapsyon ug pagtangtang sa "tunok" sa administrasyon nga mao si kanhi CJ Renato Corona, kulang pa gihapon ang gihimo niini.

Hinuon, may lain pa siyang 3 ka tuig sa pagdumala busa manghinaut kita nga dako ang iyang mabuhat sa pagkab-ot sa MDG hangtud sa panahon nga motikyup na ang tabil sa iyang termino.

Ang malnutrisyon usa sa mga problemang lisud sumpuon kay epekto lang kini sa mga gamut-hinungdan sa problema sama sa walay yuta nga maggamit sa pagtanum ug ayuda sa mag-uuma sa produksiyon, walay oportunidad sa panarbaho, kulang sa serbisyong sosyal sa gobyerno, ang pagpabiling export-oriented, pagsulod sa mga langyaw'ng namuhunan sama sa mina, ug uban pa.

Niadtong 2011, nagpaguwa og listahan ang City Health Office pinaagi sa Nutrition Division sa mga barangay sa siyudad nga may taas kaayo nga ihap sa mga malnourished nga bata. Nag-una niini ang Barangay Gumitan (36.47%), Salapawan (35.74%), Mapula (24.53%), Barangay 32 (19.5%), Dominga (18.24%), New Carmen (17.41%), Barangay 38 (16.67%), Sumimao (16.31%), Leon Garcia (15.48%), Lumiad (15.04%), Langub (14.97%), Tamayong (14.93), Marapangi (14.73%), Paradise Embac (13.66%), Mabuhay (13.55%), Barangay 31 (13.39%), Tambobong (13.28%), Baganihan (12.78%), Lampianao (12.72%), ug Ula (12.65%).

Sa tinuod daghan ang programa sa gobyernong lokal kabahin sa nutrisyon apan dili kini sustenido ug dili malangkubon. Sama pananglit sa paggamit nato og iron fortified rice (IFR) sa commercial rice subay sa Republic Act 8976 o food fortification program nga sa Davao City ra gi-implementar. Maayo na lang nga abtik ang atong Task Force on Food Fortification mao nga naduso kini dinhi. Ambot kaha sa ubang lugar sa atong nasud kung unsa na? Pag-sure mo uy!