Dura: Nagpakabana

TRESE ka tuig nang nagserbisyo ang Sun.Star Superbalita sa mga Dabawenyo. Daghan na ang nahatagan og kalipay, katagbawan, ug katumanan sa ilang mga suliran.

Daghan na sab ang mga personahe nga mas nauna pa kay nako nga miabot sa Superbalita ang nawala.

Ako kining napamatud-an pinaagi sa kanhi mga empleyado sa nga mitimbaya pinaagi sa among Facebook account.

Usa sa mga personalidad nga ilang gihisgutan mao ang among kanhi Managing Editor, Ely Luciano. Siya ang nahimong amahan sa halos tanang media practioners sa Davao.

Ang uban kanila nahimo nang mga opisyales sa dagkong network samtang ang uban nahimong opisyal sa gobyerno, ug malampuson nga negusiyante.

Gikan kaniya namo nakat-unan ang pagpadagan sa mantalaan. Ug tungod niini, subli nakong ipadangat ang pagpasalamat kaniya nga maoy nahimo nakong boss.

Siya ang nagkuha kanako kaniadto sa pagsugod pa lang sa Superbalita, 13 ka tuig na ang milabay. Apan, mipahuway ako niadtong 2001.

Ug, siya usab ang mikumbinse kanako nga mo-resign isip co-terminus employee sa Sangguniang Panlungsod niadtong Disyembre 2008.

Tungod sa among maayong relasyon isip akong boss ug iyang subordinate (vis-a-vis), misugot ako nga mobalik sa media profession.

Duha ka tuig kapin ang milabay, mipanaw siya sa laing kalibutan mao nga ako ang nakasunod sa iyang tahas sa kompanya.

Gawas kaniya, buot nakong ipadangat ang akong way puas nga pagpasalamat ngadto sa among Editor in Chief, Stella A. Estremera nga maoy nagbutang nako isip officer-in-charge samtang nangita pa kon kinsa ang mosunod nga modumala sa Superbalita.

Tungod sa tabang sa akong mga kaubanang staff, nahimo namo ang pagpadagan niini bisan wa na si Sir Ely. Busa, akong pahimuslan ang panahon nga ipadangat kaninyo ang akong kinasingkasing nga pagpasalamat sa inyong suporta.

Of course, di sab namo mahimo ang tahas kon wa ang tabang sa tanang empleyado sa kompanya ug labaw sa tanan sa mga opisyales sa Sun.Star Davao Publishing, Inc.

Kon nagpasalamat man ako sa tanang mga empleyado, sa ngalan sa kompanya, tuguti ako ninyo nga ipadangat ang among pasalamat sa mga dealers, ug readers nga kanunay nagsunod, nagbasa sa SuperBalita.

Makalaum kamo nga amo pang doblehon ang among paningkamot nga maserbisyuhan sa umaabot pang mga katuigan.

Nangaliya ako sa Labaw nga Makakagahum nga makahimo pa kami og mga aktibidad sama sa Gupitan sa Superbalita 2012 nga gisuportahan ni Mayor Sara Z. Duterte-Carpio, Congresswoman Mylene J. Garcia, former Congressman Vincent J. Garcia, Miss Arlyn L. Basquez and staff, Barangay Captain Mar Masanguid, Barangay Council, and functionaries.

Finally, I would like to express my special thanks to Mr. Art Garcia. Tungod ninyo, mga Sirs and Ma'am, nagmalampuson ang mga aktibidad sa SuperBalita. Trese na ka tuig ang Super B, apan init pang moalagad sa mga Dabawenyo!