Villareal: Pilipinas, naa bay soberinya?

HULGA na gayud kaayo ang pagsulod sa atong teritoryo sa mga Tsino. Dili basta-basta kay ang armadong puwersa pa maoy gipaon aron mamahimong kahadlokan.

Wala kitay puwersa nga ikasukol sa nagpundar nga hut-ong sa mga Insik sa usa sa mga isla sa Spratly nga gikasungian sa mga nasud nga kursonada sa rekursos naturales niini.

Soberinya ang gihisgutan niini nga unta kitang mga Pilipino magkahiusa aron ipetisyon nga dili kasaysayan ang basehanan aron angkunon ang maong mga isla.

Duna kitay International Law of the Sea nga gilagdaan sa mga nasud ilabina ang miyembro sa tinipong bansa kun UN. Nabalitaan na nato nga nagtukod na og gobyerno ang mga Insik sa nahisgutang lugar ug gawas pa niana nakatukod na diay ug dakong estraktura ang maong nasud nga giingon nilang satellite.

Nganong ako kining napatik sa akong lindog sanglit dili kini makatabang aron nga maresolbar ang maong isyu kay bisan og ang atong kagamhanan wala pay balita sa ilang gihimo? Katorse na ka mga diplomatic letters ang gipadala sa atong mga diplomatikong opisyal apan wala gayud kini tubaga sa atong kaatbang.

Buot ipasabot wala mahadlok ang Chinese government ug labaw sa tanan tataw nga wala kini respetuhi.

Apan luyo ning maong hulga, wala gayud kitay seryusong pamahayag nga giluwatan niining mga nagsaba-saba sa kadalanan nga presyuron ang gobyernong P-Noy nga seryusong atubangon ang hulga sa soberinya.

Nagpasabot usab kini nga bisan og may mga abilidad kitang makasukol sa mga mangingilog, apan kulang kaayo kita sa gamit nga ikaatbang niini.

Kung China ang atong hisgutan, ilang gihimo ang tanang mga pamaagi aron makaangkon sila sa kusog nga ikaatbang sa ilang mga kaaway. Dili kini maantigong maluoy kon ang nasud na ang hisgutan.

Alang kanila ang nasud una ug sekundarya lamang ang mga tawo. Dili balihon kon unsay isulti sa ilang mga silingan.

Kahinumdoman nga duna silay "one child policy" tungod kay grabe na kaayo ang ilang pagdaghan ug dili pa lamang dugay nabati nato ang balita nga usa ka pito kabulang buntis nga nahibal-an sa ilang gobyerno nga ilegal kining buntis sa iyang ikaduhang anak, gipakuha gikan sa taguangkan sa inahan.

Nakabalita usab kita nga ang mga fetus nga nilangkat gikan sa tiyan sa mga inahan gihimong tambal.

Kini ba nga gobyerno ang atong gusto? Kini ba ang gusto niining mga aksyonista sa komunismo?

Hinuon may punto ang akong higala nga si Alejandro Acojedo a.k.a "Double B" sa iyang pag-ingon nga wala kitay angay nga kahadlokan kon sulngon o pambombahan kita sa China. Anyway halos tanang adunahan dinhi sa atong nasud mga Insik man.

kung adunahan lamang ang atong nasud, dili kita daling hadlukon sa mga kaaway. Apan ang atong kaadunahan anaa lamang sa atong tugkaran, kutkuton lamang sulbad na ang tanan.

Alang kanako bisan ang Sagittarius Mines Inc. lang ang atong tugotan nga mapadali ang Tampakan Copper-gold project paigo na kaayo nga makasugakod kitang mga gagmay'ng Pilipino ug dili na unya lisud nga makapakusog kita sa atong depensa, depensa sa mga invaders ug depensa sa gutom.

Paminawa ang tulumanong Serbisyo para sa Masa sa DXRD-711 Khz, matag alas 9-10 sa buntag, Lunes hangtud Biyernes o sa www.stickam.com.ph/dxrd711