Editoryal: Private armies

MAS igmat karon ang 10th Infantry Division sa Philippine Army sa pagpaniid sa mga private armies sa pipila ka mga politiko sa Davao Region.

Mao kini ang gipahibawo tigpamaba sa militar nga si Lieutenant Colonel Lyndon Paniza.

Tinuod gayud nga mag-igmat ang kapulisan ug militar batok sa mga private armies nga posibleng molihok karong umaabot nga eleksiyon.

Bisan molimod ang mga politiko nga wa silay private armies, apan di kini malilong sa mga yanong lungsuranon nga nagpuyo sa probinsiya.

Gani, duha ka semana ang milabay, gibutyag ni Davao del Sur Governor Dauglas Cagas nga dunay private armies sa iyang lalawigan.

Hinuon, wa gibutyag sa gobernador ang pangalan sa agalon ning maong grupo. Pero, dayag pa sa udtong tutok ang iyang pahayag nga nagtumbok sa iyang kontra sa politika.

Kon duna may kamatuoran ang iyang pamahayag, nganong di man siya molihok aron puhagon ang giingon niyang grupo?

Iya untang gihimo ang paagi sa Regional Intelligence Unit nga malampusong miaresto kang Jose Abad Santos Mayor James Joyce uban iyang mga body guards nga naghupot og tag-as nga matang sa armas.

Tiaw mo nang, base sa taho, naghupot ang mayor og armas nga ginama gikan sa nasud Israel nga nagkantidad og P700-mil. Usa kini sa mga pinakamahal nga matang sa armas sa tibuok kalibutan.

Alang sa mayor, legal ang iyang paghupot og armas, ug nahitabo lamang kadto kaniya tungod sa politika.

Atong gikahadlukan nga sa umaabot nga eleksiyon, daghang kasamok na usab nga mahitabo tungod sa private armies!