Villareal: Kadayawan alang sa kalamboan

BULAN na sa Kadayawan, kalihukan kini sa gihiusang napulo'g usa ka tribu nga milangkob sa Dabawenyos.

Milambo ang tribu diin usa kini sa gasa sa kinaiyahan kalakip sa maayong abot nga gisaluhan sa katawhan dili lamang mga taga Dabaw apan napa-ambit usab sa ubang mga dapit hangtud na sa tibuok kalibutan pinaagi sa pagpaangkat sa atong mga produkto.

Ang rehiyon sa Dabaw, partikular na dinhi sa siyudad, gigasahan sa dili masukod nga kaayohan sa kasamtangang panahon.

Talagsaong mga lider, talagsaong panahon ug talagsaong katahum sa kinaiyahan.

Karong bulana ambitan nato pinaagi sa pagsaksi sa mga giumol nga mga kalihukan.

Seguro makaingon usab ako nga ang dakbayan sa Dabaw mao ang labing una nga nagpatuman og localized gun ban.

Gani usa sa mga kritiko niini mao si kanhi mayor ug karon bise mayor Rody Duterte, apan wala magpatarog niini si Mayor Inday Sara ug sugod kaniadtong Agosto uno gipatuman ang localized gun ban. Busa pahimangno nako sa tanang mosulod dinhi sa dakbayan karong bulana nga dili nato i-take for granted ang mga pahimangno tungod kay dunay standing order si Mayor Inday nga walay pa-ikyason nga masinupakon.

Samtang nagpadayon ang atong kalingawan matag adlaw sugod kaniadtong Agosto uno tungod sa kapistahan sa Kadayawan (ika-27 ka tuig na) masub-anong panghitabo ang nasinati sa isla sa Luzon partikular sa Metro Manila kon asa sobra sa katunga sa budget sa kagamhanan nabubo alang sa mga proyektong apil ang mga Dabawenyo sa pagtampo pinaagi sa buluhisan nga wala nato matilawan. Sama pananglitan sa LRT ug MRT, Laguna Development Project ug uban pa.

Karon sa makausa pa, misubwak ang ilang mga dam ug sapa, mibanaw sa kadalanan grabeng baha sa Metro Manila.

Midagan na dinhi sa Metro Davao ang kalamboan, sama sa real estate, diin ang rural ug suburban punting na karon sa mga proyektong pabalay.

Midagan na usab dinhi sa siyudad sa Dabaw ang nga dagkong professional squatters. Maayo na lang gani kay usa sa mga sindikato napugngan ug nasumpo ang planong pagpangilog og yuta.

Sa Toril, naa koy nailhan nga nagsugod na sa pagpangilog og yuta nga matud pa tigpa-Last Two nga kuno may gisaligang pulis nga dili mahadlok nga mosulod sa luna bisan kinural. Naa poy nagpailang presidente sa hut-ong sa mga mag-uuma nga driver kuno og traysikad sa Toril nga (ambot sa taga Department of Agrarian Reform) gibutang nga saop (tenant) sa usa ka propedad nga bisan ang tag-iya sa maong luna wala man gani makaila o miila nga trabahante sa ilang yuta.

Dinhi sa dakbayan, wala nato pugngi ang kalamboan. Busa hagit nako sa mga awtoridad ug mga ahensiya sa kagamhanan nga panalipdan nato ang mga imbestor nga dili mabiktima sa mga mapahimuslanon.

Ang Kadayawan Festival usa ka kalihukan diin atong ipakita sa tibuok kalibutan nga niay dakbayan sa Dabaw nga mamahimo nilang duawan ug kabuboan sa ilang pundo. Sumpuon ta kining mapahimuslanon.

Salamat sa atong mga tigsubay sa atong lindog nga si Dodong Argana, Jepoy Mosqueda ug si Pedro diha sa Tisado Archade sa Bankerohan.

Paminawa ang tulumanong Serbisyo para sa Masa sa DXRD-711 Khz, matag alas 9-10 sa buntag, Lunes hangtud Biyernes o sa www.stickam.com.ph/dxrd711.