Genoguin: Dobleng kalbaryo sa relihiyong Katoliko

TUIG 2010 pa ang House Bill 4244 nga mas nailang Reproductive Health (RH) bill nga ang author mao si Congressman Edcel Lagman. Wala kaayo hatagi'g panahon sa atong mga kongresista sanglit nag-alang-alang ang matag usa kanila tungod kay dakong supak ang mga kadagkoan sa relihiyong Romano Katoliko.

Tungod kay 80 porsiyento sa mga relihiyon sa atong nasud Katoliko, dili ikalimod nga kadaghanan sa atong mga kongresista nga napili sa matag distrito Katoliko ang relihiyon nila.

Karon ila nang gi-introduce sa plenaryo aron debatihan para matapus na ang mga pagduda nga basi'g kini ang hinungdan unya nga matapus ang ilang karera sa politika tungod kay walay gusto ang haligi sa maong relihiyon.

Pulos adunay mga rason ang nagpabor ug nagkontra sa maong balaudnon. Ang uban moingon nga "pro life" lagi daw sila. Ang problema lang kay pulos mga Katoliko ang nabanggaan niining maong isyu.

Ang Iglesia ni Cristo ug ang National Congress of Protestant Churches in the Philippines mipabor sa RH bill.

Bisa'g unsaon nato og balanse "Number is the name of the game". Ang atong mga kongresista maoy mag-aprobar niining maong balaod. Dili padaghanay og mga tawo sa matag kanto aron kababagan ang balaod nga dili nato gusto.

Population control ang tumong sa atong gobyerno tungod kay 97 milyones na ang atong gidaghanon karong panahona. Below poverty line na daw kita karon.

Dako'g purohan nga makalusot ang HB 4244 kay kaalyado ni P-Noy ang mga kongresista.

Doble ang kalbaryo nga sagubangon sa relihiyong Katoliko kay human niining balaora, isunod gilayon ang "Deborsiyo" nga ila usab nga gibabagan aron dili mahimong balaod.

Kitang mga responsableng ginikanan ang labaw nga nasayud kon unsa ang makaayo alang kanato. Hayahay ang pamilya nga gamay kay ato silang kahatagan sa maayong kaugmaon.

Gihusgahan na kita sa simbahan nga sala ang pagpatay sa binhi nga gitisok na sa sabakan sa atong asawa tungod sa sugo sa atong Diyos nga mabasa sa Bibliya nga "pangadto kamo sa kalibutan, pagsanay kamo ug pun-a ninyo ang kalibutan sa inyong kaliwatan".

Pero kaniadto gamay pa ang mga tawo nga nagtikawtikaw sa atong kalibutan, karon nagsobra na ang atong gidaghanon. Dili na paigo ang P35 milyon nga 4Ps nga gi- subsidy sa atong gobyerno.

Matud pa's akong silingan, kon mahimong tulisan ug drug pusher ang iyang anak inig kadako na, mas maayo pang patyon na lang siya sa binhi pa kay patyon man lang gihapon siya sa Davao Death Squad inig kadako niya. Paano kon mahimo siyang politiko? Aw, pasensiya kay walay nakatagna sa atong kapalaran.

Paminawa ang KONTRA BALANSE sa DXKT 1071 Khz 7 - 9 a.m. Lunes hangtod Sabado, ug ang RPN Visayas Mindanao Koneksiyon.