Genoguin: Atong kabuang mobalik sa atong kaugalingon

SA ADLAW adlaw nga balita telebisyon man o pamantalaan pulos baha! Baha! Baha! Sa Metro Manila ug kasikbit nga probinsiya, usa ka semana na nga wala mohulpa ang tubig.

Bisan kon andam kanunay ang National Disaster Risk Reduction and Management Council (NDRRMC), pero kulang ang mga kagamitan niini aron salbaron ang kinabuhi sa atong mga kaigsuonang mga nabiktima sa kalamidad.

Sagad sa atong maobserbahan ang gobyerno diha na mangandam kon moabot na ang katalagman.

Walay kalainan sa usa ka tawo nga makahunahuna lag ilis sa buslot nga atop sa iyang balay panahon sa ting-ulan, pero kon wa nay ulan, mawala ra pod ang iyang plano.

Resulta na kini sa 'natural ug man made calamity', ang natural dili kalikayan, pero ang mugna sa tawo mahimong likayan, sama sa legal o illegal logging, legal o illegal mining.

Ang hangin nga habagat magdala og dagkong balod, ug nasayud na kita nga moabot gyud na kada tuig. Sa ato pa, puwedeng kapangamdaman.

Daghan nang Presidente nga miagi, pero ang poblema walay sulbad ug nahimong permamente. Walay makapugong sa trahedya nga mugna sa kinaiyahan, pero adunay pamaagi sa pagsulbad, wala lang hatagig pagtagad.

Pun-an pa sa kalamidad nga minugna og tawo, nga gitugotan sa atong kagamhanan, ug mao kining nahitabo karon sa Metro Manila ug sa ubang parte sa Luzon.

Usa kini ka warning sa atong kagamhanan nga politika lang kanunay ang ginatutukan, musugot kita'g sa dili nagkatigulang na ang atong kalibutan, matag karon ug unya kanunay kitang duawon sa mga katalagman.

Kurapsiyon, pag-abuso, kahakog, pagpasagad kini ang nahitabo sa ato karong panahona.

Dunay panultihon nga nagkanayon, "Ang kabuang nga atong gihimo, mobalik ra kini kanato".

Paminawa ang KONTRA BALANSE sa DXKT 1071 Khz Lunes hangtod Sabado, ug ang RPN Visayas Mindanao Koneksiyon.