Villareal: Nangandam na mga politiko

MUBO na lamang ang panahon aron masuta na nato ang hut-ong sa politico nga mosalmot sa lugaynon sunod tuig. Tingali ang uban natingala kasayo ba sa pagpasaka sa certificate of candidacy kun COC?

Kini aron mahan-ay sa Commission on Elections (Comelec) ang mga pangalan sa mga kandidato ug sa mga partido. Naneguro nang daan ang Comelec nga mintras sayo pa, may tagak ug madungag sa listahan.

Kini resulta sa automated election gamit ang Precinct Count Optical Scan machine kun PCOS machine diin kinahanglan pa nga ipakaon ang mga detalye ug mga pangalan sa mga kandidato.

Tungod usab niini nga sistema, dili na usab angayan mabalaka ang mga bag-ong kandidato tungod kay dili na magamit ang naandang equity to the incumbent. Buot pasabot kon apilyedo lamang sa kandidato ang imong masuwat sa balota ug kon managsama ang apilyedo, ihatag kini pabor sa incumbent. Numero na lamang ang imong iduso sa kampanya.

Nagtuo ko nga dinhi sa dakbayan sa Dabaw medyo mabulokon tungod kay karon ang Hugpong sa Tawong Lungsod usa na ka lokal nga partido.

Bisan ug walay nasyonal nga partido nga sakyan sa maong partido segurado gihapon nga may kopya na kining pagagunitan.

Posible nga ang mga national party makig-alyansa na lamang sa Hugpong. Dili sama kaniadtong usa lamang ka yanong organisasyon ang Hugpong nga kinahanglan pang makig-alyado kini sa nasyonal.

Buot pasabot nga wala nay laing grupo nga modiktar sa matag lihok niini ilabina sa kampanya.

Sa akong panglantaw, nahitabo kini tungod kay ang Hugpong wala na magsalig sa pundo gikan sa national party. Tingali'g ang pamunoan sa Hugpong mikaon na og tagam sa mga nangaging kasinatian.

Karon hulaton na lamang nato ang kombensiyon sa Hugpong ug nianang tungura mahibal-an na nato ang opisyal nga kandidato niini gikan sa tulo ka mga representante sa tulo ka mga distrito uban ang mga ilang konsehal.

Ang labing mabulokon niini mao nga sa unang distrito, KINSA KAHA ANG ILANSAR NGA CONGRESSMAN? Kinsa kaha ang modagan pagka-mayor? Mobalik ba si Rody Duterte o magpasubli si Mayor Inday? Ang medyo klaro mao pa si Konsehal Polong Duterte nga modagan pagka-bise mayor.

Hulaton na lamang seguro nato nga makompleto na ang listahan ug seguro ko nga manimaho na kini karong umaabot nga tigum heneral sa Hugpong sa Tawong Lungsod.

Mahibal-an usab nato kon kinsa ang isog nga moatbang gikan sa partido sa kaatbang.

Karon pa lang seguro mikatag na ang mga espiya kontra partido.

Maayo ang plano sa pagkaumol sa Hugpong kay mamahimo na kini nga makapili kon kinsa ang dose ka senador ang bitbiton niini. Bug-at na kaayo bitbiton ang kuridas kon tinibuok.

Salamat diay sa kasamtangang Konseho sa suporta ug pagsabot sa reclassification nga gipangayo sa Johndorf Ventures Corporation sa umaabot nga labing modernong low cost housing nga tukuron sa Tierra Romana properties sa Barangay Sasa gikan sa light industrial zone ngadto na sa high residential density kun gikan sa I-1 ngadto na sa pagka R3.

Aprobado na alang sa ikaduhang pagbasa ug manghinaut ko nga sa sunod semana atol sa State of the City Address kun SOCA ni Mayor Sara sa petsa 26 ning bulana, maaprobahan na nila alang sa final and 3rd reading ubos sa komitiba ni Konsehal Cabling ug Konsehal Al-ag.