BISAN sa wala pay martial law sa Mindanao, dili na bag-o sa mga taga Davao ang checkpoints.
Adunay mga checkpoints sa mga ganghaan sa dakbayan: Sirawan sa Toril alang sa mga gikan sa Davao del Sur, Lacson sa Calinan alang sa mga gikan sa Bukidnon, Licanan sa Bunawan alang sa mga gikan sa Davao del Norte, ug dunggoanan sa barko sa Sasa alang sa mga gikan sa Island Garden City of Samal.
Gawas pa sa mga permanenteng check points nga gibantayan sa Task Force Davao, ang Commission on Elections naga-instalar usab og mga checkpoints alang sa pagpatuman sa balaod may kalabutan sa eleksyon, sama sa gun ban. Ug sa panahon nga adunay mga hulga sa dautang elemento, adunay dugang mga checkpoints ang Philippine National Police.
Mga giya sa check points sa pulis o militar
Base sa Konstitusyon, dili mahimong dakpon o usisahon ang usa ka tawo o ang iyang lugar kung walay “warrant of arrest” o “search warrant” nga gipagawas sa huwes.
Hinuon, ang Korte Suprema nagsulti nga ang mga checkpoints dili ilegal. Kini balido kung dili utingkayon ang sakyanan ug dili usisahon ang lawas sa mga tawo. Ang gitugotang pag-usisa gitawag nga “visual search” o “plain view” lamang.
Tsek sa checkpoints
Base sa mga desisyon sa Korte Suprema, nagpagawas og mga sumbanan ang Department of Justice nga angay sundon sa mga checkpoints.
Ang mga checkpoints kinahanglan hayag, adunay klarong marka ug gibantayan sa mga naka-unipormeng personahe sa pulis o militar.
Kung nagkaduol na sa checkpoint, ang nag-maneho kinahanglan mo-menor, pahinayan o i-low beam ang suga sa atubangan, ug pasigahon ang suga sulod sa sakyanan.
Mahimong mangutana ang mga nagbantay sa checkpoints sama sa atong ngalan, gigikanan ug padulngan nga lugar, ug uban pa.
Kinahanglan andam kita sa atong lisensya ug uban pang identification cards ug Certificate of Registration sa sakyanan.
Andamon nato ang atong telepono aron makatawag sa emergency numbers kung kinahanglan.
Kung adunay mga paglapas sa atong katungod, ipahibalo dayon kini sa opisyal nga responsable sa check point.
Note:
Ang manunulat naga-opisina sa ilang baryo sa Calinan, Davao City. Bag-o lang siya nibalik sa pagdawat og mga kaso nga nasangkat sa mga korte dinhe sa rehiyon. Isip ehersisyo ug kalingawan, nagadula siya og badminton matag Sabado o Domingo kauban ang iyang mga higala sa Tagum City. Siya gapuyong malinawon sa Obrero, Davao City, kung asa gabaktas-baktas matag sayo sa buntag. Sa panahon nga taas ang weekends tungod sa holidays, naga-bakasyon siya kauban ang pamilya. Siya ang natudlong Special Assistant to the President sa Integrated Bar of the Philippines (IBP –Davao City Chapter.