Eks sa checkpoints
DILI kinahanglan nga ablihan ang pultahan sa sakyanan tungod kay “visual search” o “plain view” lang ang gitugot sa balaod.
Dili kinahanglan nga usisahon pag-ayo ang sulod sa sakyanan.
Dili obligado ang mga nagsakay nga magpa-usisa sa ilang lawas, ug abrehan ang mga kumpartamento sa sakyanan o bagahe.
Check points sa martial law
Walay nausab sa mga sumbanan sa checkpoints panahon sa martial law. Bisan suspendido ang “privilege of the writ of habeas corpus,” ug gitugotan ang diha-dihang pagsikop sa mga tawong adunay salaod nga konektado sa rebelyon ug dasdas sa dautang pwersa, wala kini nagpasabot nga suspendido na usab dayon ang limitasyon sa checkpoints sa “visual search” o “plain view.”
Apan tungod sa taas nga alerto batok sa terorismo, nagpagawas ang dakbayan ug dugang mga giya sa militar ug pulis nga nagbantay sa mga checkpoints.
Lakip sa mga giya ang mas komprehensibo nga pag-usisa sa mga sakyanan ug pasahero nga musulod sa dakbayan. Tungod kay kinahanglan nga bantayan ang pagsulod-gawas sa mga tawo, mas gipahugtan ang kinahalangnon sa balidong ID. Mas maayo nga andam kita sa numero nga matawagan sa atong kapitan, kagawad o purok leader nga makapamatuod nga kita tinuod nga nagpuyo nga malinawon sa atong baryo.
Kining dugang nga mga giya resonable o makatarunganon nga pagmando sa police power sa estado kay uyon man sa tumong nga pagbantay sa kahusay ug kalinaw alang sa atong kaluwasan.
Literal o praktikal
Kung basehan ang literal o letra por letra nga interpretasyon sa balaod ug mga sumbanan nga gipagawas sa DOJ, PNP ug AFP, lakip na ang mga desisyon sa Korte Suprema, dili na unta kinahanglan pa nga mukanaog ang mga pasahero sa mga checkpoints.
Ang pagkanaog sa mga pasahero, pag-abli sa mga pultahan ug kumpartamento sa sakyanan ug mga bagahe, maoy boluntaryo natong pag-pailalom sa mas komprehensibo nga pag-usisa.
Tungod kay boluntaryo, dili malapas ang atong katungod. Ang unsa mang ebidensya nga makuha mamahimong dawaton sa korte, kung kini tinuod nga nag-gikan kanato ug dili tinanom.
Madali o malangan
Kapoy ug hasol nga malangan sa atong byahe. Apan maayo na lang kung malangan tungod ug alang sa atong kaluwasan. Ang dili maayo, kung paspas ang atong dagan paingon sa kadaotan.
Note:
Ang manunulat naga-opisina sa ilang baryo sa Calinan, Davao City. Bag-o lang siya nibalik sa pagdawat og mga kaso nga nasangkat sa mga korte dinhe sa rehiyon. Isip ehersisyo ug kalingawan, nagadula siya og badminton matag Sabado o Domingo kauban ang iyang mga higala sa Tagum City. Siya gapuyong malinawon sa Obrero, Davao City, kung asa gabaktas-baktas matag sayo sa buntag. Sa panahon nga taas ang weekends tungod sa holidays, naga-bakasyon siya kauban ang pamilya. Siya ang natudlong Special Assistant to the President sa Integrated Bar of the Philippines (IBP)–Davao City Chapter.