Roldan: Matalinghaga nga patik | SunStar

Roldan: Matalinghaga nga patik

Time to read
1 minute
Read so far

Roldan: Matalinghaga nga patik

Monday, September 11, 2017

HUMAN gibulgar ni Senador Antonio Trillanes IV ang patik sa likod ni Vice Mayor (VM) Paolo "Pulong" Duterte, nag-trending ang mga patik o "tattoo" sa internet.

Ang kauban ni Trillanes sa Senado nga si Senador JV Ejercito nagpakita sa dakong patik nga adlaw sa iyang bukton nga gigamit sa "Magdiwang faction" sa panahon sa Katipunan. Kontra niini ang "Magdalo faction" diin maoy gidalang pangalan sa pagrebelde ni Trillanes sa panahon ni PGM Arroyo.

Nagpakita sab og patik sa bukton si PRody Duterte isip sakop sa Guardian Brotherhood International. Ang mga gang, "mafia" sa Italia, America ug "Yakuza" sa Japan may kaugalingon sab nga pag-ila sa ilang mga miyembro.

Ang patik usa lamang niini. Ang uban adunay mga code ug simbolo nga sila ray nasayud.

Ang Freemasonry ug mga relihiyon sama sa Romano Katoliko may kaugalingong sinyales, simbolo ug pulong nga sila ra ang nasayud.

Ang halos tanang kompaniya sa kalibutan adunay simbolo o "logo" sa ilang grupo nga sila ra sab ang nakasabot. Gitugot kini sa gobyerno isip pag-ila sa kompaniya o produkto.

Gigamit usab kining mga simbolo sa mga terorista ug kriminal nga grupo sama sa bandera sa Islamic State of Iraq and Syria.

Mao nga may talinghaga nga naglimin sa patik ni VM Pulong kung tinuod man ang gipangyawit ni Trillanes. Ambot kaha kung asa gikan ang iyang "intel info" nga sakop sa international triad ang batan-ong Duterte? Gikan kaha kini sa Central Intelligence Agency (CIA) sa United States nga naigo kanunay sa tirada sa atong presidente?

Pipila sa mga eksperto sa politika nagsulti nga ang CIA ra ang makasabotahe sa administrasyon ni PRody sama sa ilang gihimo sa pipila ka lider sa nasud sa kalibutan.

Posible kaha nga pagsabotahe kining giyera karon sa Marawi nga hastang dugaya nahuman ug ang "war on drugs" nga sunod-sunod nga nahimong biktima ang mga bata?

Kung tinuod nga anaay patik sa triad si VM, igo na ba kining tubag kung nganong dili mahurot-hurot ang pagkuyanap sa ginadiling druga sa Pilipinas?

Kung tinuod, iya rang gidulaan ang iyang amahan nga nag-ignon "I hate drugs!" ug sa iyang giyera kontra druga nga nakakalas na'g libuan ka tawo.

Anaa ra man diay sa iyang nataran ang numero unong drug pusher.

Apan sa laing bahin, daghan ang nituo nga gigamit lang si VM Pulong sa ubang negusyante aron mopasayon sa ilang transaksiyon sa gobyerno.

Dili tingali sa druga apan sa uban pang epektos sama sa ukay-ukay, utanon, sibuyas, ahos, sakyanan, bugas, semento ug materyales pang-konstruksyon.

Kinsa goy makadili kung usa ka Duterte na ang mohangyo, di ba?
Naila ang mga Duterte sa pagkapursigido ug aksiyon agad ug ang dili paggamit sa kuwarta sa gobyerno aron madato.

Dakong posibilidad nga nakuha kining ilang bahandi karon tungod sa dugay nga lehitimong negusyo ug tarong nga trabaho.

Wala pa nako iapil dinhi ang posibleng nabahin ni PRody sa mga "treasure hunting" sa iyang mga sinaligan.

Kahibalo baya ta nga hilig sab si PRody sa mga talinghagang buhat lakip na ang pagpangita sa bahandi ni Gen. Yamashita.

Gipatik sa mantalaang Superbalita Davao Septembre 12, 2017.

View Comments