ANG Police Regional Office (PRO)-Davao nagsulti nga ila pang gipaabot ang direktiba gikan sa Camp Crame labot sa paglimita sa akses sa mga sakop sa media sa spot report sa mga istasyon sa kapulisan, apan ilang giklaro nga makakuha gihapon ang media sa mahinungdanon nga impormasyon.
"As of now, naghulat pa mi sa directives and nag-ingon ang atong regional director nga kung unsa man ang directives sa higher headquarters, amo gyung sundon," sulti ni Police Chief Inspector Catherine dela Rey, spokesperson sa PRO-Davao Region.
Ang pahayag sa opisyal miguwa dihang gipakisayran labot sa mando ni Philippine National Police (PNP) Chief Ronald dela Rosa nga di na tugotan ang sakop sa media nga makabasa sa spot report sa mga police operations.
Ang kamanduan gikaalarma sa mga sakop sa media tungod kay malimitahan na ang mga tigbalita sa impormasyon sa mga operasyon sa kapulisan.
Hinuon, giingon sa opisyal nga bisan pa man niini, mamahimo gihapon nga makakuha ang media sa impormasyon direkta sa mga tigpamaba sa kapulisan.
"Kung unsa ang mga information nga pangayuon sa media, amo gyud ihatag sa inyo para naa moy mabalita kay kinahanglan gyud namo ang media," dugang ni dela Rey.
Dihang gipangutana kung nakalapas ba kini sa katungod sa gawasnong pamahayag, siya nagkanayon nga dili makalapas, ang ila lamang katuyoan nga dunay limitasyon sa pagkuha sa impormasyon. (Alger P. Dura)