(Pasiuna: Kini ang atong apas-sumpay sa suliran nga gipadangat kanato ni Annabel of Ma-a mahitungod sa iyang gusto nga mahibaw-an kung unsaon ang ensaktong paggamit niini ug wala ba siyay angay nga ikahadlok niini.)
DEAR Annabel of Ma-a,
Ug karon magpadayon kita sa atong pag-atubang sa imong sitwasiyon. Sa niagi, ato nga gihisgutan ang primerong pamaagi kung unsaon sa paggamit og ensakto kining progesterone cream. Ania na karon ang lain pa nga mga angay nga buhaton sa paggamit niining progesterone cream.
2. Kining pagka-dominante sa estrogen mamahimong mosamot sa pagsugod sa paggamit niining natural nga progesterone cream. Sa primero man god nga pagpaila niining progesterone sa likod sa lawas human sa medyo na dugay dugay nga pagkakuwang sa progesterone, ang mga lugar nga nagadawat sa estrogen sa lawas momata ug paayuhon niini ang aksiyon sa estrogen sa hamubo lamang nga panahon. Kini ang sinyales nga ang lawas nagatubag og maayo sa progesterone, maskin pa man sa sinugdanan iya nga pagrabehon niini ang mga sintomas sa pagka-dominante sa estrogen susama sa pagsakit-sakit sa suso kung hikapon ug pagpanghubag usab niini, ang pagdugo-dugo, pagpanghupong, pagkalipong, pagkainit sa pamati, pagkakapoy, sakit sa ulo ug pagkasukaon. Kini gayud grabe nga makaguol, apan, ang nibel sa kagrabehon sa imong gibati magkaubos ug magkawala human sa duha ka siglo, samtang nagkausbaw ang nibel sa progesterone.
3. Kining stress makaapekto sa nibel sa progesterone tungod kay pausbawon sa stress ang nibel sa progesterone. Makipag- kompetensiya ang cortisol sa mga nagadawat sa progesterone. Ug kung mas hataas ang stress, mas daghan nga cortisol ang buhaton sa lawas. Kini nagpasabot nga ang mga lugar nga nagadawat sa maong mga hormones mamahimong maokupahan sa cortisol, inay sa progesterone, nga mamahimong manginahanglan og temporaryo nga pag-usbaw sa pag-suplemento sa progesterone. Kung wala nimo ginadumala ang nibel sa imong stress, ang natural nga progesterone nga cream nga imong ginagamit mamahimong dili epektibo tungod sa hataas nga nibel sa cortisol. Mao nga ipakubos gyud ang imong stress isip parte sa imong plano aron mabalanse ang nibel sa imong hormones. Chill lang gyud!
Apan, usa kita magpadayon sa unahan, tungod kay taas-taas pa man gihapon ang atong pagahisgutan mahitungod niining imong sitwasiyon, tugoti na usab ako nga ato kini nga padayunon og pagtuki sa mga sunod nga edisyon niining atong patik.
Hangtud na usab sa sunod!
Dr. Fritz
(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga Healthy is Sexy Secrets ni Dr. Fritz . Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)