Compio: Kinabuhing bukidnon | SunStar

Compio: Kinabuhing bukidnon

Time to read
1 minute
Read so far

Compio: Kinabuhing bukidnon

Friday, October 06, 2017

NATINGALA ko kay memoryado kaayo sa akong 4-anyos nga ig-agaw sa pag-agawan nga batang lalaki ang awit nga "Kinabuhing Bukidnon" ni Max Surban.

Joshua iyang ngan. Bugtong anak sa akong ig-agaw nga babaye. Diha sila nagpuyo sa Bankerohan, Davao City. Nausa kami'g puyo sugad namatay akong apuhan. Sa pikas kuwarto sila, ug sa pikas sab ko.

Ingon niya, ganahan daw siya mokanta niini kay mao man daw ang punay kantahon sa ilang maestra. Ug sa dihang pagka Dominggo na, mao sab iyang madunggan diha sa mga sonatang kinaraan nga gipatukar sa mga radio stations.

Brayt nga bata, ingon pa siya, ang unod daw sa kanta, sama sa among gipuy-an. Mikatawa ko, giingnan nako siya ug gipasabot sa sitwasiyon sa usa ka pobre, ug ang hatud niini sa pamuyo.

Sa kilid sa among balay, makita man god niya ang dakong mga punoan sa kahoy, ug pagkabuntag, iyang madunggan ang huni sa mga langgam nga nagsadya sa kaanindot sa pagsubang sa adlaw.

Nanganawkanaw sab niyang nalantawan gikan sa bintana ang mga kakahuyan sa halayong dapit, kay "overlooking" man ang makita gikan sa among balay.

Tuod man, gipaminaw gyud nako sa YouTube ang unod sa kanta nga Kinabuhing bukidnon, ug didto subling nabuhi akong kaagi sa probinsiya niadto, nga kinahanglan monaug na mi sa bukid uban sa pagpas-an og mga sugnod aron di maabtan sa pagsawop sa adlaw ilawom sa kalasangan.

Dayon, mamidpid mi sa pilapil sa humayan aron makaabot sa kalsada nga maoy agianan sa kangga sa Karabaw didto sa hacienda ni Pastor Dan sa Barangay San Agustin, Sta. Maria Davao Occidental.

Mao nang ganahan gyud ko kung moadto nako'g mga probinsiya kay subli man nga mabuhi akong kaagi, nga daw kaluha na ang bukid sa tibuok nga kinabuhi.

Nag-edad ko'g 8-anyos niadto, malipay kaayo ko nga mangadto mi sa akong lola sa Lungsod sa Sta. Maria, labi na og adlaw nga Miyerkules kay "Tabo" (mag-abot sa lungsod ang mga paninda, gikan sa ukay-ukay padung sa mga lagutmon).

Pag-uli namo, naa na koy bag-o nga tsinelas, nakadala og hotcake, naay juice sa pikas kamot ug makatulog nga nadulog ang bag-ong tsinelas, hehehe.

Si lola sab nakadala na og bugas, bulad, ug monggos, gidalhan sab si lolo og (tresbe) tabako, kay hinabako man to labi na og naa siya sa pagpamanday ug pagpanaraya (traya) panguha'g isda gamit ang pag-itsa sa gamay nga pukot nga gipabug-atan og tingga, diha daplin sa baybayon.

Maayo na lang kay ang mga kabatan-onan karon bisan naa sa baryo, maka-Facebook na, sosyal na ang kinabuhi kay diha nay selpon. Pero kadtong naa gyud sa hilit nga dapit sa bukid, layo pa gyud sila sa kabag-ohan ug suwerte na kaayo kung makataak sa lungsod.

Ug maayo na lang sab gani karon, daghan na og mga kompaniya nga mopaambit sa ilang grasya pinaagi sa ilang corporate social responsibility ngadto sa mga kabukiran labi na og hinangat ang Kapaskohan.

Di igsapayan ang kakabus, basta nagpuyo lamang kita nga malinawon ug dunay dakong pagtuo sa Diyos.

Gipatik sa mantalaang Superbalita Davao Oktubre 07, 2017.

View Comments