Editoryal: Hukasan sa takuban | SunStar

Editoryal: Hukasan sa takuban

Time to read
1 minute
Read so far

Editoryal: Hukasan sa takuban

Friday, October 06, 2017

NINDOT kining bag-ong kamandoan nga gipagawas ni Philippine National Police (PNP) Chief Ronald dela Rosa ngadto sa mga sakop sa kapulisan.

Pinaagi niini, mahatagan na gyud og sulbad ang dugay nang suliran sa giingong duha ka mga armado nga sakay og mga motorsiklo o riding in tandem.

Dugay na kini nga problema ug hangtud karon naa pa gihapon nga mikutlo na og daghang kinabuhi.

Usahay magduda ang katawhan kon duna ba kahay kalabutan ang kapulisan niining modus operandi sa mga tawo nga nakasakay og motorsiklo.

Dunay uban nga gilikida sa tandem nga dunay mga rekord sa kapulisan nga nalambigit sa nagkadaiyang krimen o bahin sa druga.

Samtang duna say uban nga biktima, way mga rekord sa pulis nga maoy nakahatag og tanghaga kon nganong gipamatay sila.

Posible sab nga mga gikabingkil lang kini sa mga biktima ang mihunos kanila, ug iagi lang sa riding in tandem aron nga ipahid ang krimen ngadto sa tinuod nga nagpaluyo sa kalihukan.

Puriso si Dela Rosa mimando sa mga regional directors sa kapulisan sa tibuok nasud nga mohimo og lakang sa mga serye sa pagpamusil sa riding in tandem.

Wala man tuod mohatag og ultimatum ang PNP Chief sa mga regional director sa kapulisan sa pagresolba sa suliran, apan kinahanglan nga duna matud pa silay itunol nga igong accomplishment bahin sa nahisgutang isyu.

Gani nagbahad si Dela Rosa nga kon mapamatud-an nga wala silay gihimo bahin niini, tanggalon sila sa kasamtangang puwesto.

Sa tinuod lang, maayo kini nga kamandoan kay mahukasan na unya sa takuban kining mga tandem aron ilhon ang ilang tinuod nga pagkatawo ug mapasakaan og kaso aron kahatagan og hustisya ang ilang mga gibiktima.

Gipatik sa mantalaang Superbalita Davao Oktubre 07, 2017.

View Comments