Talento: Octoberfest | SunStar

Talento: Octoberfest

Time to read
1 minute
Read so far

Talento: Octoberfest

Friday, October 06, 2017

HELLO, mga miga ug migo! Maayong adlaw kaninyo. Sa bulang Oktubre, ubay-ubay seguro ang maghinubog sa dalan, pare, kay dinala sa "Octoberfest." Dili kini pista sa mga santo apan tradisyon sa mga palahubog, migo.

Ang "Octoberfest" mao ang pinakadakung "beer festival" sa mga Aleman (German) nga ginapahigayon matag tuig sa Germany (siyemre!) sugod sa Septyembre ngadto sa unang semana sa Oktubre.

Ginatawag pod kini'g "travelfest" tungod sa minilyong mga tawo nga modayo sa maong nasud aron makigduyog kanila.

Ang Oktoberfest importanteng bahin sa kultura sa mga Aleman nga gisugdan niadtong tuig 1810 pa, hik!

Diri sa Pinas, ubay-ubay pod ang mga aktibidad nga giandam aron masadya ang maong kasaulogan. Suportado kini siyempre sa mga "beer company," hik! Alangan, agi nila kini'g promosyon sa ilang mga produktong ilimnon.

Don't get me wrong kay wala ko nag-endors og bisan unsang “makahubog” ug “makahubag” nga ilimnon. "Hubag" kay kung dugay makauli sa balay, malabayan og plato ni nanay. Gani ang uban, mangita'g away, ug ang mas delikado kanang manghagit og "patay!"

Sa pagkatinuod, ningsilip ra ko gamay sa history aron ipulutan nato karon, mare, hik hik!

Sa mga manginumay, "peace lang kita mga bay!" Kung mahubog, uli diretso sa balay aron walay mga inosenteng madamay.

Ayaw mo'g kasuko nganong dili ko apil sa susamang bisyo kay kini grasya ra gayud sa Ginoo. Bisan unsa pod nako'g tulon, dili man lami ang susamang ilimnon. Pait baya! Karon na lamang gisagulan og pagpatam-is aron makaagni og daghan nga mahimo nilang palahubog, inahan!

Ang Bibliya nagpahimangno kanato nga likayan ang mga makahubog nga ilimnon kay maghatud kini sa kadautan, igsuon. Pero aduna pod bayay teksto sa Bibliya diin giingnan ni Pablo si Timoteo nga moinom og bino aron tambalan ang pagpanakit sa iyang tiyan (1Tim.5:23), bro.

Ang pinakaunang milagro ni Hesus mismo mao ang paghimo sa tubig sa bino sa kasalan kay nahutdan ma'g ilimnon ang hingtungdan. Diri nga teksto, pampasadya ang katuyoan, migo. Bisan wala giingon direkta sa Bibliya nga makasala ang pag-inom og alkohol APAN klaro nga ginadili niini ang paghubog-hubog.

Basaha ra god sa Epeso 5:6 kay nagkanayon kini nga, “Ayaw kamo paghubog-hubog sa bino nga nagapadulong sa pagpatuyang, hinonoa pagpauno kamo sa Espiritu."

Ang pagpatuyang og inom, duol sa disgrasya, igsuon. Ang World Health Organization (WHO) mismo nagkanayon nga 40% ang nakutloan og kinabuhi tungod dili na kabiya sa adiksyon sa tinagayay, migo.

Ang nangamatay sa edad nga 25-34 tungod mibagtok ang atay sa alkohol ning abot na'g 76.5 %. Ang paghubog-hubog nagdugang sa risgo sa mga kanser sa baba, tutunlan, atay, dughan ug uban pang parte sa kalawasan.

Sa sige'g tagay, dili na ta kaingon puhon og, “magandang buhay” kay lagi padulong man sa kamatay! Impas na hinuon ang atong tanang utang, higala kung kita na ang ihaya, hik!

Seriously, alagaan nato ang atong mga kaugalingon. Dili nato kini abusuhon kay mahal na baya ang lungon karon. Unya na seguro kung dunay "buy 1, take 1" aron dili kaayo bug-at sa pamilya nga atong mabiyaan. Peace - hik!

Gipatik sa mantalaang Superbalita Davao Oktubre 07, 2017.

View Comments