Editoryal: Gikan sa dautang paagi | SunStar

Editoryal: Gikan sa dautang paagi

Time to read
1 minute
Read so far

Editoryal: Gikan sa dautang paagi

Thursday, November 09, 2017

DAGHANG mga tawo karon naningkamot aron nga mabuhi taliwala sa kapit-os sa pagpuyo.

Dunay daghan natong kaigsuonan nga bisan unsa na lang ang gikuri-kuri sa pinobre nga paagi aron nga makapalit sa ilang inadlaw-adlaw nga panginahanglan sa panimalay.

Sama pananglit, nianang pagpangariton sa palengke o kaha pagpaninday og gulay aron human ang usa ka adlaw nga pagkugi, mokita na og diyutay ug duna nay ikapalit og bugas ug sud-an.

Naa poy nagkugi pinaagi sa pagpamasada og traysikel o pedicab aron kakuhaan og kuwarta aron nga makakaon makatulo ka higayon sa usa ka adlaw.

Gawas niini, naa pay daghan nga pamaagi nga gihimo sa atong mga kaigsuonan aron nga makakuwarta ug makatubag sa panginahanglan sa tibuok pamilya.

Pinobre lang man tuod kini, apan desente nga trabaho ug wa kay gipurwisyo nga laing tawo.

Di sama nianang uban nga naningkamot lagi nga makakuwarta apan gipaagi sa dautang paagi.

Gigamit ug mipahimulos sila sa ubang tawo aron nga makasapi.

Sama na lang pananglit sa napatik ning atong mantalaan kagahapon nga usa ka call center agent gikilkilan.

Ang nakaparat pa gyud kay ang suspek usa ka babaye. Pastilan, sa iyang pagkadalaga nakabuhat pa gyud siya og ingon niini?

Kantidad sa P10 mil ang iyang gipangayo sa biktima bugti sa di kuno niya pagbulgar nga dunay kabit ang biktima.

Hinuon, nadakpan siya sa kapulisan sa San Pedro Police Station human ang suspek nangayo og panabang sa mga awtoridad.

Di lang kini, duna pay daghang pagpanguwarta nga gihimo pinaagi sa dautan nga paagi.

Dunay usa ka kanhi Overseas Filipino Workers didto sa kaulohan nga gibiktima sa Budol-budol gang.

Kantidad sa P5 milyones ang natangag gikan kaniya sa mga suspek nga padayong gawasnon pa ning panahona.

Ang nakapait kay ang maong salapi, gikan sa iyang hinagoan samtang nagtrabaho pa siya sa gawas sa nasud.

Dugo ug singot ang iyang gipatulo niini aron ugma damlag duna siyay mapaabot apan laing tawo na man hinuon ang mipahimulos niini.

Giilad siya pinaagi sa pagpasalig nga mokita siya sa negusyo nga gihanyag sa mga suspetsado apan wala diay kadtoy kamatuoran.

Pastilan pod ning uban natong mga kaigsuonan nga wala man lang makonsensiya. Manguwarta man lang gani "to the expense" pa gyud sa laing tawo apan sa dinautan sab nga paagi.

Namilyonaryo sila sa ingon lang niini kadali nga paagi. Di kaha sila makarma nga ang ilang nasapi gikan man sa dugo ug singot sa laing tawo?

Nakaako sila sa pagkaon nga gipalit gikan sa kuwarta nga dili ila samtang mga biktima intawon maoy nasakripisyo.

Gipatik sa mantalaang Superbalita Davao Nobyembre 10, 2017.

View Comments