Compio: Uswag Davao Occidental | SunStar

Compio: Uswag Davao Occidental

Time to read
1 minute
Read so far

Compio: Uswag Davao Occidental

Saturday, November 11, 2017

HALOS magduha ka dekada na ang milabay una ko nakabalik sa Malita, Davao Occidental ning miaging semana lang, gumikan naimbitahan ko nga mo-cover sa ilang 2nd Founding Anniversary.

Eksayted ko nga subling makatunob sa Malita nga sakop pa sa Davao del Sur niadto ug nabahin kini sa duha ka distrito pinaagi sa plebisito niadtong 2015.

Sakay mi sa van uban ang akong mga kaubanan sa buhat ug gilayong nanganawkanaw sa akong panumdoman ang kaniadtong pag-apas namo ni lola sa akong uyoan nga usa ka mananagat sa Malita, gumikan didto naman kini naminyo.

Wa ko magdahom sa dakong kalamboan sa maong dapit, ang kaniadto nga pasayanan ug kasagingan, karon duna nay dako kaayong planta ug dagko na ang mga establisemento.

Gani si Davao City Mayor Sara Duterte-Carpio ang halandong bisita gumikan gusto ni Occidental Governor Benjamin Bautista ug Occidental Vice Gov. Franklin Bautista nga makita sa mga Duterte ang dakong kalamboan.

Dungan sa anibersaryo, nag-abli sab og negusyo ang akong higala nga si Mercedita "Merce" Lim, ang MDCL Media and Events Chief Executive Officer ug RDL Magazine Publisher.

Gibuksan niya ang laing branch sa Rams Travel Agency sa tumong nga dali na lang makapa-booking og plane tickets ang mga taga Malita ug di na nila kinahanglan moadto pa sa Digos City.

Hinuon, plano sab ni Merce nga mag-abli og laing branch sa Digos City karong Disyembre dungan sa branch niini sa Bacolod City ug karong Nobyembre 27, ablihan ang laing Rams Travel Agency sa Manila.

Gani, dako sab nga prebilihiyo alang kanako nga nahimong kabahin sa production sa tv commercial sa Rams Travel Agency nga gi-taping pa sa nagkalain-laing dapit sa Davao Region.

Kung dili seguro sugo sa trabaho niadtong mga taknaa, di gyud ko kabalik og Malita, pero bisan paman nga sa kalayo sa biyahe gikan Davao City, di sayang ang mga takna alang nako, gumikan ang duha ka dekada, gialim sa usa ka adlaw.

Garbo nako nga nalakip ko sa pagsaulog gumikan taga Sta. Maria Davao Occidental sab ko, ang dapit nga dunay dakong kabahin sa akong pagkatawo, karon.

Davao Occidental, padayon sa pag-uswag, ug magkita pa kita, puhon!

Gipatik sa mantalaang Superbalita Davao Nobyembre 11, 2017.

View Comments