Legario: Bag-ong Tuig, bag-ong paglaum | SunStar

Legario: Bag-ong Tuig, bag-ong paglaum

Time to read
1 minute
Read so far

Legario: Bag-ong Tuig, bag-ong paglaum

Sunday, December 31, 2017

SA SUD usa ka tuig niining molabayay nga 2017, testingan nato og ihap ang mga butang nga mga nahitabo nga naghatag kanato og pangandoy nga maglaum og mga solusyon gumikan niining mga kasablagan.

Atake sa Maute- mao tingali kini ang pinakadakung isyu nga nahitabo niining tuig 2017. Sa pipila ka mga bulan, nagdugay ang giera didtong dapit taliwala sa mga kasundaluhan sa gobierno batok sa mga Maute group, nga gisuportahan sa ISIS. Kining hitabua naghatud kanato nga mangandoy ta og kalinaw, nga atong nabaton human sa taas nga panahon.

Isyu sa druga- kining isyu nagapadayon sukad pa sa paglingkod sa atong president tungod sa iyang plataporma batok niini. Sa kasamtangan, mabati sa mga katawhan ang katawhay tungod kay ang mga drug addicts nangawala na or nangtago ba. Nihinay ang baligyaay, tungod tingali daghang nangamatay. Ato nalang gilauman nga kunta mangundang na ning atong mga kabatan-onan og gamit niining mga makadaot nga druga, ug mag-undang pud og pamaligya kining mga drug dealers. Mangita kunta sila og maayo nga negosyo. Aron hapsay ang atoang pagpuyo niining kalibutana.

Kalamidad- daghang mga kinabuhi ang nasayang tungod sa mga kalamidad nga mga nanghitabo. Baha, sunog, lindol ug uban pa, nagsayang og mga kinabuhi, kabtangan ug kwarta. Nagahandum kita karon nga hinaot, mas maandam kitang tanan sa mga kalamidad nga possible mahitabo karong bag-ong tuig.

Niining milabay'ng Sabado lang, nagdungan ang sunog sa usa ka dakung mall dinhi sa Davao ug ang baha nga gihatud sa bagyo. Subay sa balita sa radyo, 38 ang nangasunog biktima sa sunog. Kaluoy intawon sa mga nabiktima sa baha sab, wala pay klaro kung pila gayud ang nangalumos pud.

Kadtong nilabay'ng Dominggo, among gitabangan og panglimpyo ang among kauban sa simbahan nga nabahaan. Kabugoy ba gayud niining baha; sa kalit, iyang ibalhin imong sofa ngadto sa balkonahe sa imong silingan.
Hinuon, hatdan pud ka niya og lamesa gikan sa pikas bay. Unya, bas-on pa niya ang tanan nga iyang malabyan. Bilinan pa jud og lapok ang tanang hilit-hilit sa imong bay.

Kining mga hitaboa nagahatod kanato nga maglaum og lugar, panahon nga kunta wala na’y ingani nga mga problema. Apan, ang kamatuoran, sa kadaghan nang milabayng bag-ong tuig, wala gihapo’y kabag-ohan o mas arang-arang nga tuig ang atong nahi-aguman pila na ka mga tuig ang nilabay.

Tanang tuig nagdala og ilang mga kalamidad ug problema. Busa, kung aduna ma’y kabag-uhan nga atong lauman karong 2018, dili kini sa mga butang sa kalibutan, o mga sitwasyon palibot nato. Ang atong lauman nga kabagohan mao ang atong mga batasan, kina-iya, pamaagi sa pagkab-ot sa atong mga handum. Dili nato himuon ang dautan, apan atong sundon ang saktong dalan. Pinaagi niini, bisag unsay mahitabo kanato, ang Dios makakita sa atong putling kasing-kasing, ug ipahat kanato ang nagakaigong grasya gikan kaniya.

Maayong Bag-ong Tuig, mga higala.

Gipatik sa mantalaang Superbalita Davao Disyembre 31, 2017.

View Comments