SI TRAFFIC Management Center (TMC) officer-in-charge Ret. Col. Desiderio Cloribel naghangyo karon sa katawhan nga isumbong sa ilang opisina ang mga tawo nga nangilkil gikan sa mga drayber.
Dili mabalaka kadtong mga magsumbong tungod kay sumala ni Cloribel nga andam silang dawaton ang mga reports gikan sa mga tawo nga nabiktima.
Lagmit nga ang hangyo sa kanhi pulis nga si Dick Cloribel nadasig sa pagkasikop sa entrapment operation sa usa ka traffic enforcer nga giakusar nga nangotong.
Ang Traffic enforcer (ngan gipugngan kay giimbistigar pa ang kaso), nasikop sa hiniusang pwersa sa Davao City Police Office (DCPO) Intelligence Division ug sa mga tawo ni Cloribel, alas 6:30 sa gabii niadtong Septyembre 17 sa kanto sa mga dalang Bangoy ug Magsaysay.
Siya gidakop tungod kay gipasanginlan nga nangilkil.
Kining uwahing suspek kabahin lamang sa daghang nadakpan nga mga traffic enforcer nga nagbiktima sa alaut nga mga drayber sa de pasaherong mga sakyanan.
Dili kita mutuo nga napugos sila sa pagpangilkil tungod sa kawad-on. Kining mga tawhana gisuholan og sakto sa kagamhanan ning syudad busa wa nay rason nganong mangotong pa. Gawas pa, bisan og unsa kakabus ang usa ka tawo dili niya mahimong gamitong rason ang iyang kahimtang sa panginabuhi sa pagpirwisyo sa ubang tawo.
Kinahanglan tingali nga una pasudlon og trabaho kining mga enforcer, tudloan gyud sila og husto bahin sa ilang bulhaton ug sa maayong pamatasan. Maayo usab nga kadtong adunay pruyba nga nangotong di na pasayluon, putbolon dayon sa serbisyo aron di makatakod.