Editoryal: 'Uso-uso' drivers kulob ang kaldero

MIKATAP karon ang balita nga mga 'uso-uso' driver nangluod kay gilutos sa kagamhanan ning siyudad sa Davao mao nga naglusad og 'silent protest'.

Namatikdan nga pipila kanila, ilabi na kadtong ang mga ruta mao ang Calinan, Toril ug Lasang mihunong na sa pagpamasahero sa maong mga lugar.

Nakatimaho sa gihimo sa mga drayber, si Mayor Sara Duterte nagmando dayon nga padaganon ang mga bus sa mga ruta nga gibiyaan sa mga nagprotesta nga mga drayber aron dili matanggong sa kalsada ang gatusan ka mga pasahero.

Sa samang higayon usab, ang Vice Mayor's Office milyamar nga andam kini mogasto og minilyon ka pesos batok sa nagprotesta nga mga drayber sa "uso-uso".

Ang uso-uso mao ang mga de pasahero nga mga dyip nga gitaoran og dagkong makina sa mga trak aron tulin modagan.

Napikal sa gihimo sa mga drayber, si Vice Mayor Rodrigo Duterte nagsulti nga maggahin siya og pundo aron gastohon sa pagpadagan sa mga bus ug ubang sakyanan nga mobiyahe sa mga tulo ka mga ruta sa dugay nga panahon.

Kun atong subayon, ang kampanya batok sa mga sakyanan nga nailhan karong uso-uso nahimo human nangamatay ang 9 ka mga pasahero niadtong miaging buwan.

Angay hunahunaon sa mga hingtungdan drayber nga ang gobyerno naglantaw sa kaayohan ug kaluwasan sa tanan.

Dili maayo nga pasagdan ug dili sumpuon ang abuso. Wa tingali gobyerno nga magpakabuta sa buhat nga nakahatag og hulga sa kinabuhi sa katawhan.

Mao kini ang isyu nga ang mayoriya sa katawhan modapig gayud sa kagamhanan ning siyudad.

Nangita lamang kining mga operator ug drayber sa mga uso-uso og labad sa ulo. Kun ipadayon sa siyudad ang pagpadagan sa mga bus sa ilang ruta, kulob ilang kaldero.

Ug ang mas sakit dinhe kun tumanon sa siyudad ang bahad niini nga hangyuon ang Land Transportation Franchising and Regulatory Board (LTFRB) nga kanselahon ang mga prangkesa sa mga sakyanang uso-uso nga midumili sa pagbiyahe sa ilang mga ruta. Mura mo og nagkuha og bato ug gidokdok sa inyong ulo.