Roldan: Pag-ampo sa Bag-ong Tuig

MALIPAYONG Bag-ong Tuig kaninyong tanan!

Nius-os na gayud ang tabil sa 2010 ug nikayab na ang bandila sa 2011. Taas-taas gayud ang panahon sa bakasyon nga usahay makaluya. Kinsa may makalikay sa mga lamiang pagkaon ug ilimnon tungod sa kadaghan sa mga imbitasyon? Gawas sa Pasko, naa pay mga parties, reunions, birthdays ug pagtapok sa pamilya. Mao kini ang panahon sa pagpadugang og timbang kaysa makuhaan. Busa daghan ang mobisita sa ospital sa Enero.

Mao usab kini ang panahon nga lisod pagsulat og kulom o balita sa pamantalaan. Mas sayon ug malipayon man god ang pag-uban sa akong mga gagmay'ng tsikiting sa mall aron mopalit og mga butingting sa tindahang gitawag namo og "insik-insik."

Mas lami sab sa baga ang pagtampisaw sa tubig ug suroy-suroy sa puti nga baybayon sa IGACOS kauban ang mga minahal sa kinabuhi.

Pero sa akong kabahin, mao na kini ang usa sa pinakamalipayong Pasko ug Bag-ong Tuig sa mga Pinoy nga akong natiman-an. Taas kaayo ang gihandom sa katawhan sa umaabot ilabi na nga naghanyag ang administrasyon ni P-Noy sa pag-abli sa hinabing pangkalinaw tali sa MILF ug NDF karong tuiga.

Bisan tuod kon wala makuha ni P-Noy ang 100% nga suporta gikan sa masa ug sa iyang mga kaaway sa politika apil na ang Supreme Court, mora'g nakita ang iyang pagkasinsero sa pagpaminaw sa sentimento sa iyang mga boss.

Apan siyempre ato pang lantawon kon motaas ba ang oportunidad sa panarbaho dinhi, modaghan ang serbisyo sosyal, madugangan ang mga eskwelahan ug mga magtutudlo, daghang health centers ug health professionals, mawagtang ang mga kurakot ug eskalawag sa serbisyo ug unta magtunhay na ang hustisya ug kalinaw sa atong nasud.

Moabot na unta ang kinasang-an sa atong pagkatimawa sama sa 40 ka tuig nga paglawig sa katawhang Israelita sa kamingawan ngadto sa yuta sa saad. Giluwas sa Diyos ang iyang mga piniling katawhan pinaagi ni Moses gikan sa kamot sa madaugdaugong Eheptohanon ug malantaw na sa katawhan ang mga bidlisiw sa suga sa pinuy-anan sa yutang saad. Apan ang pangutana kay makaabot ba kita didto? O mapareha kita kang Moses nga nakakita tuod sa suga apan ang iyang mga tiil wala mabahiri sa bisan usa ka pidyot sa abog gikan sa maong yuta? Busa magpadayon kita sa pag-ampo dungan sa pagningkamot sa bag-ong ugma kanato ug sa atong mga kaliwat.

Ingon pa sa text message sa akong higala "Dili magminatay sa mga adlaw nga nilabay. May adlaw nga nagsapinday sa kalipay, adunay nabulit sa kasakit. Sugaton ta ang 2011 nunot sa kasibot sa kasingkasing."

World Filipino Alliance

Napahigayon ang pinasahing General Assembly sa WFA niadtong Disyembre 30. Usa kini ka NGO nga gisalmotan sa mga sakop sa tibuok kalibutan alang sa pagtabang sa mga OFWs ug pagduso og mga adbokasya alang sa kaayuhan sa atong nasud.

Talagsaon kining maong panagtigom tungod kay gipaagi sa Skype sa internet o gitawag nga tele-conferencing. Nagpili usab ang asembliya sa ilang mga opisyales alang sa sunod duha ka tuig. Congrats Sec-Gen Roger Bantiles sa imong tabang.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph