Roldan: Sagop Askal, gusto ka?

Monday, November 22, 2010

NIADTONG niaging semana niadto ako ug ang akong asawa sa usa ka mall sa Bajada para sa among grocery. Sa ganghaan sa maong mall among nakita nga may Caucasian o puti nga nanghatag og leaflets mahitungod sa Babas Asong Pinoy Rescue Ko (BARK) project. Kung wala ko masayop ang Babas Foundation usa ka nasudnong NGO nga nagtabang sa kabus nga Pinoy.

Talagsa ra ta makakita og puti nga mora kagwapo ni Piolo Pascual o Sam Milby nga manghatag og papel sa dalan gawas kung misyonaryo sila. Matud pa sa leaflet "ang BARK nagkinahanglan og mobuluntaryo sa paghatag og pinuy-anan sa mga asong kalye o Askal nga ilang nasalbar sa Tambucho Gas Chamber."

Have something to report? Tell us in text, photos or videos.

Tuod man human sa pipila ka adlaw sa pagdawat nako sa leaflet, ang nasudnong TV nagbalita og usa ka pag-rescue sa mga pulis ug animal rights groups sa 10 ka Askal didto sa kaulohan. Kung wa pa tingali kini nasanta, hayan nga gimatada ug gibaligya na kini sa mga karenderya ug restawrant sa kaulohan diin kinaham ang iro.

Niadtong didto ko sa Colombia, South America sa 2006, ang usa sa mga sagad nga gipangutana kanako kabahin sa Pilipinas mao kung mokaon ba ko og iro?

Sa tinuod, di ko mokaon ug wa pa sad ko katilaw og iro sukad. Apan gisultihan ko sila nga daghang mga Pinoy nga mokaon og iro. Modayon dayo'g siga sa ilang mata ug moingon "Mama Mia, Tirreble! Que barbaridad!" Pero nasayod kita nga hugot nga gipatuman dinhi sa Davao ang pagpanakop og Askal. Ingon pa ni kanhi Mayor Rody nga kung mahimo pusilon ug paligsan na lang ang iro kung makadisgrasya kini sa kinabuhi sa tawo. Tiaw mong minilyon ang gasto sa kagamhanan sa Davao sa anti-rabies ug medisina sa paak sa iro. Iyang gidayeg si Kapitan Renante Gumahin sa Callawa nga namusil og mga Askal sa iyang barangay.

Ang atong City Veterenarian's Office nag-rescue sa mga hayop nga latagaw ug ilang i-impound sa usa ka lugar diin lukaton sa mga tag-iya. Kung sa tukmang panahon nga dili sila malukat, ilang sunugon ang mga hayop sa dakong incinerator o oven aron mamatay.

Para kanako ang makalilisang nga paagi sa pagdispatsar sa hayop mao ang paggamit sa Tambucho Gas Chamber nga nakita nato sa TV. Klaro nga nag-antus gayud ang mga iro una sila namatay.

Makahinumdom ko sa istorya kung giunsa pagpatay ni Hitler ug sa iyang Third Reich niadtong WWII ang 3 ka milyong Judeo didto sa death camps ginamit ang makinang diesel. Makalilisang kaayo ang ilang kamatayon. Matud pa sa mga survivors ug opisyal sa NAZI nga dugay kaayo mamatay ang biktima. Pila ka oras nga mag-antus sila ug pagkahuman makita ang ilang lawas nga magbunta-og ug naglunang sa ilang ihi, hugaw og suka, mibudlot pa ang ilang kalimutaw ug mi-berdi ang bulok sa ilang panit dala sa pagkahilo sa carbon monoxide. Busa dili kita gusto nga mahitabo kini sa atong mga binuhi busa kinahanglan ang responsableng pag-atiman sa iro.

Kadtong gustong moalima og Askal, puwedeng mo-email sa babasdogrescueprogram@gmail.com o tawagi si Chris sa 300-5640 ug 0909-2877136.