Villareal: To be or not to be?

KARON kay nahuman na man ang piniliay sa barangay ug sa Sangguniang Kabataan, tingali'g makapahulay na gyud ang matag usa nga dugay nang nagpaabot nga makasalmot ug naningkamot nga makadaug.

Kaniadto daw gibaliwala lamang ang barangay election tungod kay labing gamay kini nga ang-ang sa kagamhanan ug labaw sa tanan kay dako na og madawat nga honorarium ug may internal revenue allotment na ilabi na niadtong mga barangay nga may saktong kita.

Tungod niini, dili lang kay medyo apan daw wala nay kalahian ang pagpangandam sa mga kandidato ug suporter alang sa maong kalihukang lugaynon sa barangay.

Apan labaw sa tanan dili lamang ang barangay election gi-ilogan sa mga hamtong apan lakip na sa kabataan.

Una, aron makabaton og impluwensiya sa katilingban ug mahulagway na nato nga bisan ang mga kabataan mas maantigo pang mamolitika kon itandi sa mga hamtong.

Nganong makaingon ko nga labaw pa sila sa mga hamtong? Kung atong ma-obserbahan, ang kabataan mao nay tigplano sa mga hamtong sa ilang kampanya ug pamaagi sa pagkumbinsi sa mga botante.

Kon dili man sila ang tigplano, sila mao ang tigpatuman sa polutikanhong kalihukan sa ilang mga principal. Busa kon kining mga kabataan mao nay mohulip sa mga hamtong dekalidad nga kampanya maoy atong makita kanila.

Dili na lamang ko mohatag og mga pananglitan kinsa kadtong mga kanhi aktibong kabataan nga misubay na sa regular nga piniliay ug nahimong mga opisyal sa siyudad.

Lantawa ra god ninyo ug obserbahi kadtong mga kabataan nga hangtud sa ilang pagkahamtong nagdala sa ideyalismo. Gahi gayud nga manaug sa mga regular nga eleksiyon, apan kadtong mga nawala na ang ilang pagka-ideyalismo segurado gayud nga makaapil sa gitawag nga main stream sa sosyedad.

Buot nako nga ipasabot nga ang kabataan nga nalambigit sa tradisyonal nga politika, 99.9 porsiyento gayud nga makadaug. Apan kadtong nagpabiling alternatibo haskang gahia modaug.

Sa laktod alang kanako, kining SK mao gayud ang unang ang-ang sa tradisyonal nga klase sa eleksiyon.

Dayag nga ang politika sa atong nasud usa ka klase nga proseso nga kon dili ka halang og kalag ug dili ka maantigo nga mokapital hanap gayud ang imong paglaum nga modaug.

Daghan kaayo ko og mga higala nga misalmot sa eleksiyon ug tungod kay bisan og lollipop dili gani mahibalong mohatag kay nagtuo silang kon kini himuon, klase kini sa gitawag og kurapsiyon nga dili madawat sa ilang prinsipyo.

Ang uban kanila aron kuno makasulod sa main stream, molambigit na lamang sa tradisyonal nga politika ug diha na kuno nianang tungura sila na ang magsugod sa pagbag-o.

Apan wala koy nakitang kabag-uhan ug hinuon sila maoy nadala sa tradisyonal nga sistema ug hangtud natapos na lamang ang ilang termino wala gayud silay nabag-o sa dagan sa politika ug dili dinhi exempted bisan ang mga partylist groups.

Nagtuo ko nga ang tinuod nga kasulbaran sa dunot nga sistema sa eleksiyon mao ang pagwagtang sa mga suweldo ug honorarium. Apan mahimo pa ba kaha kini dinhi sa atong nasud?

Mao kini ang gitawag nga "to be or not to be, that is the question." Alang sa imong sugyot ug komentaryo sulat lang sa amcorphil.leo@gmail.com. Paminawa sab ang dxRD commando 711, matag alas 6:00-8:00 sa buntag, Lunes hangtud Sabado.