Sabado, Hunyo 9, 2007

Fuente O gibawi

DAW sa nagkagrabe ang panagbingkil nila ni Gob. Gwen Garcia ug Mayor Tomas Osmeña kay kagahapon nipahibawo ang Kapitolyo nga sila na ang mangalagad sa Fuente Osmeña.

Si Cebu Provincial Legal Officer Marino Martinquilla nipadalag suwat kang Osmeña kagahapon nga bawion na sa kagamhanan sa lalawigan sa Sugbo ang Fuente Osmeña kay sila man ang nanag-iya niini.

Matod ni Martinquila nga ang tanang mga kalihukan alang sa paggamit sa dapit ug pagmintinar niini gikinahanglan nga mananghid na sila sa Kapitolyo lakip ang pagpaubos una sa “screening” sa Kapitolyo.

Iyang gibutyag nga nidisider silang kuhaon na ang rotunda gikan sa City Hall nunot sa insidente niadtong nagsingabot ang eleksyon sa Mayo 14 dihang gigamit kini sa grand rally sa Bando Osmeña-Pundok Kauswagan (BOPK) ug Team Unity.

Nipadayag siya nga atol sa naasoyng adlaw puwerting hugawa sa Fuente Osmeña tungod sa mga campaign materials ug grabe pa gyud ang problema sa trapiko niadtong higayona.

“It is hereby requested that the City of Cebu shall immediately refrain from exercising acts of ownership and administration over the said rotunda and for it to turnover to the Province of Cebu, within 15 days from the receipt hereof, all documents relative thereto, including but not limited to the requests for its use by other parties,” nagkanayon ang suwat ni Martinquilla ngadto kang Osmeña. (JECT)

(Hunyo 9, 2007 isyu)

Sunod nga balita: Mga pulis gikiha sa gidunggab