Huwebes, Hulyo 12, 2007

Mayor hayan ang ilakip pagkiha

HAYAN ilakip sa pagkiha ang mayor sa lungsod sa Bogo kon mapasaka na ang kaso sa pagpangulata sa chief photographer sa Sun.Star ug pag-ilog sa balota sa supporters sa mayor.

Ang kapulisan sa lungsod sa Bogo nakaduso nag mga ngalan sa mga tawo nga giingong nikulata kang Alex Badayos niadtong Lunes sa hapon ug kadtong tawo nga nikuha sa balota.

Hinuon ang pangulo sa Cebu Police Provincial Office Senior Supt. Carmelo Valmoria wa pa mobutyag sa mga ngan niini. Ila sab nga gipaabot ang Commission on Elections (Comelec) nga maoy mosang-at og reklamo ngadto sa korte.

Si Valmoria nga nahinabi sa mga tigbalita niingon nga sa pagka karon padayon pa nilang gi-evaluate ang mga ngalan nga ilang nakuha.

Lakip sa ilang gisusi di lang ang ningkulata kang Badayos kon di lakip na ang niilog sa ballot boxes.

Gibutyag ni Valmoria nga mohimo silag letter request aron ipadala sa ABS-CBN ug GMA-7 aron makapangayo silag kopya sa ilang footages sa insidente.

Matod niya nga gumikan kay moabot og 700 ka mga tawo di sila makatumbok dihadiha kon mao ba kini ang ningkulata kang Badayos.

Apan gitataw ni Valmoria nga ang Comelec maoy ilang gipaabot nga mosang-at og reklamo ug sila sa kapulisan maoy mohipos og mga ebidensiya ingon man mohatag og saksi.

Gipasabot ni Valmoria nga ang ilang gihimo ug pag-adto sa lugar may kalabutan sa kamandoan sa Comelec.

Hinungdan sila nagpaabot nga kini maoy mosang-at og reklamo labot sa tanang insidente lakip na ang pagkulata kang Badayos.

Iya usab nga gibutyag nga kon duna may kasong mapasaka hayan lakip sa pasakaan og kaso mao si Mayor Celestino Martinez tungod kay ang pagpundok sa mga tigpaluyo tataw nga gimando sa usa ka tawo. (DRT)

(Hulyo 12, 2007 isyu)

Sunod nga balita: Benhur mokiha sa Comelec officials