Huwebes, Hulyo 12, 2007

Benhur mokiha sa Comelec officials

NISANG-AT ugmang adlawa atol sa “Friday the 13th” ni Kong. Benhur Salimbangon ang mga kaso batok sa mga opisyal sa Commission on Elections (Comelec) ug sa tresurero sa sa siyudad sa Bogo nga nalambigit sa giingong pagpeke sa mga election return.

Human nag-awhag si Gob. Gwen Garcia kang Sun.Star Photographer Alex Badayos nga mosang-at og kaso sa mga tigpaluyo sa mga Martinez nga nikulata kaniya, samang awhag ang gipalanog ni Salimbangon ug ni Presidential Management Staff (PMS) Director- general Cerge Remonde nga kanhi nangulo sa Kapisanan ng mga Brodkaster ng Pilipinas (KBP).

Ang bag-ong kongresista sa ika-upat nga distrito nipahibawo nga pasakaan nila sa kasong kriminal ug administratiba silang Bogo Election Officer Jose Minguez, Election Assistant Mylene Pitogo ug Bogo Treasurer Rhett Menguez human nideklarar ang Comelec Second Division nga ang 15 ka mga election return (ER) gikan sa Bogo mga “spurious and manufactured.”

Iyang gipasabot nga gikinahanglang isang-at niya ang kaso aron hatagag hustisya ang katawhan sa ilang distrito.

Nasayran, nga gikuwestyon ni Salimbangon ang naasoyng mga ER hinungdan nga nalangay ang pagproklamar sa mananaog nga kongresista ug sakop sa Hunta Probinsyal alang sa ika-upat nga distrito. (JECT)

(Hulyo 12, 2007 isyu)

Sunod nga balita: Labing unang industrial park alang sa mga SME gibuksan