 |
Huwebes, Hulyo 12, 2007 |
Noy kulas: Maoy nasurprisa
Dear Noy Kulas,
Maayong adlaw kanimo. Tawga lang ko sa ngalan nga Mr. Scorpio, 26, minyo, dunay usa ka anak.
Ang akong problema bahin sa pagpangabit sa akong asawa. Kini siya, Noy, gidawat ko siya bisan di ako ang unang lalake nga nakauna niya. Bisan pa man, nasayod ko nga daghan na ang mga lalake niagi sa iyang kinabuhi ako gihapon siya nga gidawat ug gipakaslan kay nahigugma man lagi ko niya sa tinuoray. Ako nibarog isip maayo nga bana ug amahan sa among anak apan baliktad ming duha.
Nanarbaho ni siya karon tua sa layo, gawas ngari sa Cebu. Bisan dakong supak sa akong kabubut-on nga magkalagyo mi, ako lang siyang gitugtan kay ingon siya alang kuno sa among kaugmaon ug sa among anak ang iyang pagpanarbaho.
Tuod man maayo ang dagan kay magsige mig communicate sa text ug call. But after three months, nausab ang hangin kay di na man kaayo siya mo-reply sa akong mga text ug kon mo-call ko niya, talagsa ra ko makakontak.
Mao to nga nakahukom ko nga ako siyang apason ug i-surprise nako siya. Sa dihang niabot ko sa iyang gitrabahoan nakurat ko sa akong nakita kay nasakpan sila nako sa iyang kabit nga loving kaayo gikan nga nanuroy. Ako siyang gipangutana ug nitug-an siya sa tanan nga may relasyon sila.
Nasakitan ko sa akong nahibaw-an ug naglagot ko apan ako lang gipugngan ang akong kaugalingon kay di ra ba akong lugar.
Niuli na lang ko nga nagbawon sa kalagot ug kasakit. ug karon nia nako sa Cebu uban sa akong anak. Gusto ko nga makig-annul sa among kasal. Mao ni akong pangutana: Pwede ba ko maka file og annulment? Pwede ba ma annul nako ang among kasal bisan di siya masayod o di ko magpahibawo niya nga gi-annul nako ang among kasal? Sa huwes mi gikasal, Noy Kulas. Ang ako lang dili na nako makaya ang iyang kahigal sa mga lalake. Nagtinarong man unta ko niya apan siya lang ang dili. Tabangi ug tambagi ko sa angay nakong buhaton. Salamat kaayo and God bless.
MR. SCORPIO
Mr. Scorpio,
Ikaw na hinuon ang nasurprisa dihang sa imong pag-apas kay imo man siyang nasakpan nga duna na diay laing lalake. Sa iyang pagbiya kaninyo, kadto timailhan na nga duna gyuy higayon nga kamo iyang kalimtan ug biyaan kay duna ka man kahay igo-igong panginabuhi nga magamit sa pagpakaon sa imong pamilya. Unya ang iyaha tingaling income alang lang sa pagsapar sa dugang panginahanglan?
Duna na man sab kay history niya nga nagkalainlaing lalake ang iyang gikarelasyon ug si bisan kinsa na lang ang niagi sa iyang mga kamot. Di man tuod angay nga I-judge ang usa ka tawo base sa iyang past kon duna may di siya maayong kagahapon basta mag-reform lang siya. Apan wa man diay siya mag-usab bisan nagminyo na mo. Niadto untang mipalayo siya, wa ka gyud unta mosugot base sa iyang history. Anyway, nahitabo na man, unsaon pa man na.
Duna ka may katungod sa pagpasakag kasong annulment base sa wa na niya pagpauli sa inyoha ug moako sa iyang responsibilidad isip imong asawa ug inahan sa inyong anak. Pahibaw-on man gyud na siya kon mo-file kag petisyon alang sa annulment sa inyong kasal kay patubagon man gyud na siya. Apan, di na lang ko mohatag pag dugang mga detalye kay naa ra na sa imong abogado unsay iyang buhaton.
Naa ka man kahay labing minos P60,000 aron ikagasto sa imong pagpasakag annulment petition batok sa imong asawa? Mao nay labing minos mong andamon. Kay legal man ang imong suliran, ang mga detalye makuha mo sa imong abogado unya. Naa ra nimo unsay imong buhaton. Husto man ang imong nahuna-hunaan nga putlon mo ang talikala sa inyong kaminyuon.
NOY KULAS
(Hulyo 12, 2007 isyu)
Sunod nga balita: Sugilanon: Baruto
