Miyerkules, Hulyo 18, 2007

Comelec sa Bogo 'gi-ransack'
Joseph Elvir C. Tubilan, Superbalita

HUMAN napakyas ang Commission on Elections (Comelec) sa pagkuha sa gikinahanglang election returns gikan sa siyudad sa Bogo kay gibabagan sa mga tawo ni Mayor Celestino “Junie” Martinez Jr., ning higayona giingong gilisodlisod sa mayor ang ilang lokal nga buhatan sa Comelec.

Si Bogo City Election Officer Joe Menguez nitaho kang Acting Provincial Election Supervisor Lionel Marco Castillano nga gi-ransack ang ilang buhatan niadtong Hulyo 11, giilisan ang door knob sa pultahan ug giputlan pa kinig kuryente nga wa sila pahibaw-a.

Niini, nag-awhag si Menguez sa iyang gipadangat nga taho kang Castillano kagahapon nga unta ibalhin sa laing dapit ang ilang buhatan gawas sa Bogo City Hall.

Iyang gisuwatan usab si Martinez nga nagpahibawo sa tinguha niya nga mobalhin silag laing lugar alang sa ilang buhatan.

“Without necessarily questioning your action of changing the doorknob/key, cutting the electric connection to our office without our knowledge, please be informed that the undersigned has requested our Provincial Office that we be allowed to transfer our office to another place possible,” nagkanayon si Menguez sa iyang suwat kang Martinez nga gipetsahan niadtong Hulyo 16.

Ning sitwasyon karon, si Castillano nimando kang Menguez nga mangita og dapit nga ilang mabalhinan nga mapaigong masud ang ilang mga dokumento nga ibutang niini.

Sa iyang bahin, si Martinez namahyaag nga wa siya makadungog nga gi-ransack ang buhatan sa Comelec apan kon tinuod man kini, angay lang nga imbestigahon kini sa kapulisan.

Nidugang ang mayor nga gihatagan na niyag bag-ong kopya sa yawe alang sa bag-ong door knob sa Comelec.

Si Menguez nisaysay nga niadtong Hulyo 11 dihang paingon na siyang mosud sa ilang buhatan, gipahibawo siya sa ilang casual employee nga nangakatag ang mga butang sud sa ilang buhatan sama sa V-SAT antenna, black board, mga dokumento ug files unya ang usa ka jalousie blade sa ilang bentana nahanaw na.

Nimando siya sa nitahong empleyado nga di nalang hilabtan kini.

Niadtong Hulyo 13, ni-report ang iyang assistant lakip ang casual employee aron kuhaon ang duha ka mga computer aron butangan kinig SK (Sangguniang Kabataan) programs sa Comelec Provincial Office.

Dihang naghuwat na kinig bus alang sa siyudad, dunay pulis nga nipugos sa pagpabalik kanila sa ilang buhatan kay napakyas sila sa pagpangayog permiso sa mga dagkong opisyal sa Bogo busa nituman na lang sila aron way gubot.

“When I called and explained to the treasurer about the purpose of getting the computer it was thereafter released,” nagkanayon si Menguez.

Atol sa pagsugod sa pagpangrehistro sa barangay ug SK niadtong Hulyo 15 diin ibalik na sa pagbutang ang computer, di na sila makasud niini kay ang yawe di na mosigo sa door knob.

Kay nakit-an sila sa pulis nga on-duty niadtong higayona, niabli ginamit ang laing yawe ug dinhi nasayran ni Menguez nga giilisan na ang yawe. Gani, nangayog pasaylo ang pulis sa insidente apan igo lang siya nisunod sa unsay mando sa “higher officials of Bogo.”

“When we will enter our office, we have to ask permission from the police or from the mayor’s office,” dugang padayag ni Menguez.

Gawas niini, nipahibawo siya nga giputol ang koneksyon sa kuryente sa ilang buhatan.

Ning sitwasyon karon, naghangyo si Menguez kang Castillano nga hatagan siyag close-in security ug mahimo temporaryong idestino siya sa buhatan sa Provincial Election Supervisor (PES) o sa Regional Election Director (RED).

Apan, si Martinez nibutyag nga niadtong Biyernes may kamanduan na nga si Menguez giilisan na isip pangulo sa Comelec sa ilang siyudad ug gihulipan siya ni Fernando Hortelano. (JECT)

(Hulyo 18, 2007 isyu)

Sunod nga balita: Kaduha na kawati